Արամ Ա կաթողիկոսի տնօրինությամբ Տեր Զորը կունենայ իր կենտրոնական
յանձնախումբը
26-01-2010 16:00:00 | | Հասարակութիւն
ԱՆԹԻԼԻԱՍ: Ինչպէս հաղորդում են Մեծի Տանն Կիլիկիոյ կաթողիկոսութեան մամլոյ
ծառայութիւնից, Մեծի Տանն Կիլիկիոյ Արամ Ա կաթողիկոսը ութ տարի առաջ
Տեր Զորը հռչակել է Համազգային ուխտատեղի` նկատի ունենալով
Տեր Զորի ներկայացրած
յատուկ կարեւորութիւնը հայկական ցեղասպանութեան ճանաչման եւ
ազգային պահանջատիրութեան հարցում: Այդ առիթով Արամ Ա-ն կոչ է
ուղղել ժողովրդին` ուխտի գնալ այնտեղ, նորոգել
հաւատարմութիւնը մէկուկէս միլիոն նահատակների նուիրական յիշատակին:
Տեր Զորի կարեւորութիւնը շեշտելու եւ ուխտագնացությունները
աւելի կազմակերպելու նպատակով Մեծի Տանն Կիլիկիոյ
կաթողիկոսութիւնը յատուկ ուղեգիծ է մշակել եւ դրանք գործադրելու
համար իր պատգամներն է փոխանցել Բերիոյ Հայոց թեմին:
Հաղորդագրութիւնից տեղեկանում ենք, որ Բերիոյ հայոց թեմի
անմիջական հսկողութեամբ` Տեր Զորի համալիրի, շրջակայքում գտնուող
Մարկատեի ու այլ եկեղեցիների եւ նահատակաց վայրերի յատուկ
տեսչություն է հաստատուել: Յիշեալ շրջանի տեսուչ է նշանակուել Մեծի
Տանն Կիլիկիոյ կաթողիկոսութեան միաբաններից Վահան վարդապետ
Բերբերեանը:
Տեր Զորին եւ շրջանին առնչուող բոլոր միջոցառումների,
ուխտագնացությունների ու աշխատանքների ընդանուր պատասխանատու
Կենտրոնական յանձնախումբ է նշանակուել, որի նախագահն է Շահան
եպիսկոպոս Սարգիսյանը: Յանձնախմբի կազմում ընդգրկուել են Գրիգոր
վարդապետ Չիֆթճյանը, Յակոբ Աթեշյանը, Արմէն Խաչատուրյանը, Սիլվա
Ճապաղջուրյանը, Յարութիւն Վարդանեանը, Ենովք Սյուլահյանը եւ Վահէ
Ժամկոչեանը: Բերիոյ հայոց թեմի կողմից պատրաստուել եւ Արամ Ա
կաթողիկոսի կողմից հաստատուել է Կենտրոնական յանձնախմբի եւ
տեսչության գործունէութեան յատուկ կանոնադրութիւն: