Կարինէ Դանիելեանի կարծիքով, հայ-թուրքական
արձանագրութիւնների նախաստորագրումը ծուղակի մէջ է գցել
Հայաստանին
08-10-2009 19:00:00 | Հայաստան | Քաղաքական
ԵՐԵՎԱՆ, 8 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայ-թուրքական
յարաբերութիւնների կարգաւորման գործընթացի եւ նախաստորագրուած
հայ-թուրքական արձանագրութիւնների վերաբերեալ հասարակութեան
կարծիքը պարզելու նպատակով «Ազատ հասարակութեան ինստիտուտ»
հասարակական կազմակերպութիւնը Երեւանում անցկացրել է հեռախօսային
հարցում-ուսումնասիրութիւն: Ինչպէս նշեց հոկտեմբերի 8-ի
ասուլիսում կազմակերպութեան ղեկավար Էդգար Յակոբեանը, հարցմանը
մասնակցել են 18 եւ աւելի բարձր տարիք ունեցող 1306 քաղաքացիներ:
Հարցուածների մեծամասնութիւնը` 61,6%-ը, տեղեակ է
հայ-թուրքական յարաբերութիւնների կարգաւորման վերջին
զարգացումներից: Նրանց 58,7%-ը դրական է վերաբերւում հայ-թուրքական
յարաբերութիւնները կարգաւորելու նախաձեռնութեանը, 29,2%-ը`
բացասական, իսկ 12,1%-ը` չէզոք: Հարցուածների 48,5%-ի կարծիքով
արձանագրություններում չկան նախապայմաններ, իսկ 37,2%-ը գտնում է,
որ կան: 22,4%-ը գտնում է, որ հայ-թուրքական սահմանի բացումը աւելի
շատ անհրաժեշտ է Հայաստանին, 16,3%-ը` Թուրքիային, իսկ 22%-ը`
Հայաստանին եւ Թուրքիային:
ՀՀ Հանրային խորհրդի անդամ Կարինէ Դանիելեանի կարծիքով, շատ
յաճախ նման հարցումներին մարդիկ անկեղծ չեն պատասխանում` վախի
պատճառով: «Նրանց յաճախ թւում է, որ ստուգում են, թէ իրենք ինչպէս
են վերաբերւում իշխանութիւններին»,- ասաց նա: Կ.Դանիելեանը
Հանրային խորհրդի այն եզակի անդամներից է, որի կարծիքով,
արձանագրութիւնները դրականից շատ աւելի շատ ռիսկեր են
պարունակում: «Իմ կարծիքով, մենք ծուղակի մէջ ենք: Նախաստորագրում
արդէն տեղի է ունեցել, գործընթացը սկսուել է, միջազգային
հանրութիւնը ողջունել է: Եթէ մենք հիմա հրաժարվենք, ապա շատ
բացասական վերաբերմունքի կարժանանանք»,- ասաց Կ.Դանիելեանը: