Հայաստանի Ազգային Ժողովը սեպտեմբերի 16-ին վաւերացրեց 4
միջազգային վարկային համաձայնագիր
16-09-2009 19:12:00 | Հայաստան | Տնտեսութիւն
ԵՐԵՎԱՆ, 16 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի Ազգային
Ժողովը սեպտեմբերի 16-ին վաւերացրեց նախօրէին քննարկված 4
միջազգային վարկային համաձայնագրեր:
Հայաստանի Հանրապետութեան եւ Միջազգային զարգացման
ընկերակցութեան միջեւ 2009թ.-ի յուլիսի 7-ին ստորագրուած «Զարգացման
քաղաքականութեան առաջին գործողութիւն» ֆինասավորման համաձայնագրով
ՀՀ-ին կտրամադրուի 40,4 մլն SDR-ին (Յատուկ փոխառության
իրաւունքներին) համարժէք գումար կամ շուրջ 61 մլն ԱՄՆ դոլարի վարկ:
Ըստ հիմնական զեկուցող, ՀՀ ֆինանսների փոխնախարար Վարդան Արամեանի,
վարկը տրամադրւում է 20 տարի ժամկէտով, որից 10 տարին` առանց
գումարի մարման իրաւունքի:
Հայաստանի Հանրապետութեան եւ Վերակառուցման եւ զարգացման
միջազգային բանկի միջեւ 2009թ.-ի յուլիսի 31-ին ստորագրուած
«Ոռոգման համակարգերի վերականգնման հրատապ ծրագիր» փոխառության
համաձայնագրով կտրամադրուի 30 մլն ԱՄՆ դոլար 27 տարի ժամկէտով, որից
5-ը` արտօնեալ: Համաձայնագրի նպատակն է ընտրուած տարածքներում
ոռոգման ջրի օգտագործման արդիւնաւէտութեան բարելաւումը եւ
գիւղական շրջաններում անմիջական զբաղվածության խթանումը: Ըստ
հիմնական զեկուցող, ՀՀ տարածքային կառավարման նախարարութեան Ջրային
տնտեսութեան պետական կոմիտէի նախագահ Անդրանիկ Անդրէասեանի, երկու
տարում նախատեսւում է վերականգնել 83,81 կմ երկարությամբ գլխաւոր
ջրանցքներ, այդ թւում Թալինի (59,01 կմ ) եւ Արմաւիրի (24,8 կմ )
ոռոգման համակարգերում:
Հայաստանի Հանրապետութեան եւ Միջազգային զարգացման
ընկերակցութեան միջեւ 2009թ.-ի յուլիսի 21-ին ստորագրուած Զարգացման
քաղաքականութեան վարկի երկրորդ ծրագրի նախապատրաստման ՄԶԸ Ք670-ԱՄ
կանխավճարի համաձայնագրով կտրամադրուի 590 հազար ԱՄՆ դոլար: Գումարը
կուղղուի ծրագրի խորհրդատուական ծառայութիւններին:
Հայաստանի Հանրապետութեան եւ Ասիական զարգացման բանկի միջեւ
2009թ.-ի յուլիսի 15-ին ստորագրուած «Ճգնաժամի յաղթահարման
աջակցութեան ծրագրի (յատուկ գործողութիւններ)» վարկային
համաձայնագրով նախատեսուած է երկու մասով վարկի տրամադրում 51,378
մլն SDR ընդհանուր գումարով կամ 80 մլն ԱՄՆ դոլար: Վարկային
համաձայնագրի տեւողությունը 24 տարի է, որից 8 տարին առանց գումարի
մարման իրաւունքի: Ըստ հիմնական զեկուցող ՀՀ էկոնոմիկայի նախարար
Ներսէս Երիցյանի, համաձայնագրի նպատակն է օժանդակել ՀՀ-ին`
համաշխարհային ֆինանսատնտեսական ճգնաժամի ազդեցութիւնը
մեղմացնելու հարցում: