GTZ-ն տեխնիկական աջակցութիւն է ցուցաբերում Հայաստանի
խորհրդարանի Ֆինանսավարկային եւ բիւջէտային հարցերի մշտական
յանձնաժողովին
01-09-2009 16:08:00 | Հայաստան | Տնտեսութիւն
ԵՐԵՎԱՆ, 1 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի Ազգային
Ժողովի Ֆինանսավարկային եւ բիւջէտային հարցերի մշտական
յանձնաժողովի անդամներին եւ աշխատակազմին համակարգչային տեխնիկա
տրամադրելու նպատակով սեպտեմբերի 1-ին հնձնաժողով էին այցելել
Գերմանական տեխնիկական համագործակցութեան ընկերութեան (GTZ-ի)
ծրագրերի տնօրէն Ջեյմս Մակբեթ Ֆորբսը եւ Հայաստանում ԳԴՀ գործերի
ժամանակաւոր հավատարմատար Մելանի Մոլթմանը: Այս մասին «ՆՈՅԵԱՆ
ՏԱՊԱՆ»-ին յայտնեցին ՀՀ ԱԺ Հասարակայնութեան հետ կապերի
վարչութիւնից:
Շնորհակալութիւն յայտնելով GTZ-ի ներկայացուցիչներին
աջակցութեան համար, ԱԺ փոխնախագահ Սամուէլ Նիկոյանը նշել է, որ
2008թ.-ին ստորագրուած` խորհրդարանի հետ համագործակցութեան յուշագրի
շրջանակներում իրականացyող ծրագրերը, ինչպէս նաեւ GTZ-ի բոլոր
նախաձեռնութիւնները Հայաստանում յաջողուած են ու արդիւնաւէտ: Նա
հոյս է յայտնել, որ ԱԺ-ի հետ համագործակցութիւնը շարունակական
բնոյթ կունենայ:
ԱԺ ֆինանսավարկային եւ բիւջէտային հարցերի մշտական
յանձնաժողովի նախագահ Գագիկ Մինասեանն էլ նշել է, որ GTZ-ի հետ
յանձնաժողովը համատեղ աշխատանքի արդիւնաւէտ փորձ ունի: Որպէս
համագործակցութեան լաւ օրինակ նա մատնանշել է «Վերահսկիչ պալատի
մասին» գործող օրէնքը, որի կիրառման երկու տարիների ընթացքում
փոփոխութեան որեւէ առաջարկ չի ստացուել` չնայած օրէնքի կարգաւորման
լայն դաշտին: Յանձնաժողովի նախագահն առաջարկել է համագործակցութեան
յաջորդ փուլերում մասնագիտական կարողութիւնների բարելաւմանն
ուղղուած միջոցառումներ եւս իրականացնել:
Մելանի Մոլթմանն իր հերթին ընդգծել է ԱԺ-ի ֆինանսավարկային եւ
բիւջէտային հարցերի մշտական յանձնաժողովի գործառոյթների
կարեւորութիւնը` յատկապէս բիւջէի նկատմամբ վերահսկողութիւնը, եւ
այն լաւագոյնս իրականացնելու համար աջակցելու պատրաստակամութիւն
յայտնել: