ԼՂՀ-ի անցեալ վերադարձնելու ցանկացած փորձ հղի է
հակամարտութեան նոր սրացումով
17-07-2009 17:00:00 | Հայաստան | Քաղաքական
ՍՏԵՓԱՆԱԿԵՐՏ, 17 ՅՈՒԼԻՍԻ, ՆՈՅԵԱՆ ՏԱՊԱՆ: Ադրբեջանա-ղարաբաղեան
հակամարտութեան կարգաւորման շուրջ վերջին զարգացումների
կապակցութեամբ ԼՂՀ արտաքին գործերի նախարարութիւնը յուլիսի 15-ին
հանդէս է եկել յայտարարութեամբ, որում ասւում է.
«ԼՂՀ-ի դիրքորոշումը ադրբեջանա-ղարաբաղեան հակամարտութեան
կարգաւորման վերաբերեալ մնում է անփոփոխ: Անհնար է հասնել
հակամարտութեան կարգաւորմանը` անտեսելով առկայ իրողութիւնները:
Լեռնային Ղարաբաղի Հանրապետութիւնը անցեալ վերադարձնելու ցանկացած
փորձ ոչ միայն անարդիւնաւէտ է, այլեւ հղի է հակամարտութեան նոր
սրացումով: Բանակցութիւններում իրական առաջընթացի հնարաւոր է
հասնել միայն բանակցային գործընթացի բոլոր փուլերին ղարաբաղեան
կողմի լիարժէք մասնակցութեամբ: Ցանկացած համաձայնութիւն, որը
շոշափում է Լեռնային Ղարաբաղի Հանրապետութեան շահերը, ճակատագիրը
եւ ապագան, չի կարող ընդունուել առանց այդ երկրի ժողովրդի եւ նրա
ճակատագրի համար անմիջական պատասխանատւութիւն կրող ղեկավարութեան
մասնակցութեան:
Հոյս ունենք, որ խաղաղ կարգաւորման մէջ շահագրգիռ
դերակատարները թոյլ չեն տայ տարածաշրջանի ստատուս քվոյի խախտումը`
որպէս հետեւանք կարգաւորման ներկայիս բանաձեւի հիման վրայ
բանակցային գործընթացի արագացման:
Ելնելով վերոնշեալից` գտնում ենք, որ անհրաժեշտ է
խեղաթիւրուած բանակցային գործընթացի վերաբեռնավորում, որպէս
բանակցային գործընթացի լիիրաւ կողմ ԼՂՀ-ի վերադարձ
բանակցութիւնների սեղանի շուրջ եւ կարգաւորման հիմնարար
սկզբունքների փոխակերպում»:
ԴԱՍ. ՀԱՅԵՐԵՆ 
Հայերեն
Русский
English
French