«Դելտա Փարթներս» ընկերութիւնը 6 մլն դոլարի է ներդրում ADC
ընկերութեան կապիտալում
03-02-2009 22:00:00 | Հայաստան | Տնտեսութիւն
ԵՐԵՎԱՆ, 3 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Հեռահաղորդակցության,
մեդիայի եւ տեխնալոգիաների ոլորտում մասնագիտացուած «Դելտա
Փարթներս» ինտեգրացված կառավարման խորհրդատու եւ ներդրումային
ընկերութիւնը միացել է «Արմէնիան Դեյթաքոմ Քամփնի» (ADC)
ընկերութեան գործունէութեանը` կատարելով 6 մլն դոլարի չափով
ներդրում: Ինչպէս փետրուարի 3-ի ասուլիսում յայտարարեց ADC-ի
գլխաւոր տնօրէն Հարալդ Գրիթենը, դա կնպաստի ինչպէս ընկերութեան
կողմից առաջարկուող ծառայութիւնների փաթեթի, այնպէս էլ
ծառայութիւնների մատուցման աշխարհագրային ծածկոյթի զարգացմանն ու
ընդլայնմանը:
Ըստ նրա, «Դելտա Փարթներս»-ի ներդրումը եւ մասնագիտական փորձը
հնարաւորութիւն կընձեռնի ADC-ին ամրապնդելու իր դիրքերը
բնակարանային բաժանորդների շուկայում` առաջարկելով ինտեգրուած
ծառայութիւնների փաթեթ: Հ.Գրիթենի խօսքերով, ցանցի ընդլայնումը
իրականացուելու է ինչպէս Երեւանում, այնպէս էլ երկրի հիւսիսային
մասում գտնուող այլ քաղաքներում:
ADC-ն Հայաստանում կշարունակի IP/MPLS համակցման տեխնոլոգիայի
վրայ հիմնուած իր գերժամանակակից օպտիկամանրաթելային ցանցի եւ
վիրտուալ անսահմանափակ հզորութիւնների ընդլայնումն ու
շահագործումը: Նշուեց նաեւ, որ «Դելտա Փարթներս»-ի գրասենեակները
գտնւում են Դուբայում եւ Եոհաննէսբուրգում: Ըիկերությունը
տրամադրում է բիզնես ծառայութիւններ երեք ուղղութիւններով`
մասնաւոր կապիտալի ներդրումներ, խորհրդատուական, կորպորատիվ
ֆինանսաւորման:
Հ.Գրիթենի կարծիքով, այն հանգամանքը, որ ներդրումային ծրագիրը
իրականացուել է համաշխարհային տնտեսակական ճգնաժամի պայմաններում,
վկայում է այն մասին, որ նոր ներդրողը հաւատով է մօտեցել ADC-ի
հզորությանը, շուկայում նրա գրաւած դիրքին ու բիզնեսի որակին:
«Նրանք կարողացան նաեւ ճիշտ գնահատել որպէս ներդրումային երկիր
Հայաստանի կարողութիւնները»,- ասաց ADC-ի գլխաւոր տնօրէնը: