Յունվարի 24-ից Հայաստանում կսկսի գործել ֆինանսական
համակարգի հաշտարարի գրասենեակը
23-01-2009 18:00:00 | Հայաստան | Տնտեսութիւն
ԵՐԵՎԱՆ, 23 ՅՈՒՆՎԱՐԻ, ՆՈՅԵԱՆ ՏԱՊԱՆ: Յունվարի 24-ից
Հայաստանում իր գործունէութիւնն է սկսելու ԱՊՀ-ում առայժմ միակ`
ֆինանսական համակարգի հաշտարարի գրասենեակը: Ինչպէս յունվարի 23-ի
ասուլիսում նշեց ՀՀ Կենտրոնական բանկի նախագահ Արթուր Ջաւադեանը,
սա մեծ առաջընթաց է Հայաստանի համար, քանի այդպիսի գրասենեակներ
գործում են հիմնականում զարգացած երկրներում: Նրա գնահատմամբ,
ֆինանսական հաշտարարի ինստիտուտի ներդրումով կբարձրանայ
հասարակութեան վստահութիւնը հայաստանեան ֆինանսական համակարգի
նկատմամբ:
Ֆինանսական հաշտարարի գրասենեակի ստեղծման նպատակն է
սպառողների բողոքների ընդունումը եւ քննումը, ինչպէս նաեւ
ֆինանսական ինստիտուտների եւ սպառողների միջեւ վէճերի լուծումը:
Ա.Ջաւադեանը նշեց, որ գրասենեակի ծառայութիւնները սպառողների
համար լինելու են բացառապէս անվճար: Սպառողները կարող են
հաշտարարին իրենց դիմում-բողոքները ներկայացնել միայն տուեալ
ֆինանսական ինստիտուտի հետ հաշտութեան գալու չյաջողուած փորձից
յետոյ: Հաշտարարի կայացրած որոշման հետ համաձայն չլինելու դէպքում
սպառողներն այդ վճիռը կարող են բողոքարկել դատարանում, ինչը
ֆինանսական ինստիտուտների համար թույլատրելի չէ. նրանք պարտաւոր են
ենթարկուել հաշտարարի կայացրած վճռին: Հաշտարարին կարող են դիմել
միայն ֆիզիկական անձինք: Բողոքները պէտք է լինեն 10 մլն դրամը (մօտ
33 հազ. ԱՄՆ դոլար) չգերազանցող գործարքների վերաբերեալ:
Ֆինանսական հաշտարարի գրասենեակի գործունէութեան ծախսերը
իրականացուելու են բացառապէս ֆինանսական կազմակերպութիւնների
կողմից:
Նշենք, որ Ֆինանսական հաշտարարի գրասենեակի հոգաբարձուների
խորհրդի նախագահ է ընտրուել ՀՀ ԿԲ-ի խորհրդի անդամ Գրիգոր
Ղոնջեյանը, հաշտարար` Փիրուզա Սարգսեանը: Հոգաբարձուների խորհուրդն
ունի 6 անդամ` ընտրուած պետական եւ մասնաւոր կառոյցներից: