Մոսկուայում սպանուել է Գրոզնու նախկին փոխքաղաքապետը
05-02-2009 17:26:00 | Ռուսաստան | Միջազգային
ՄՈՍԿՈՒԱ, 5 ՓԵՏՐՈՒԱՐԻ, ՆՈՅԵԱՆ ՏԱՊԱՆ: ՌԴ մայրաքաղաքում անյայտ
անձանց կողմից սպանուել է Գրոզնու նախկին փոխքաղաքապետ Գիլանի
Շեպիեւը, հաղորդում է «Ինտերֆաքսը»:
«36-ամեայ Շեպիեւը գնդակահարուել է մօտաւորապէես 1.00-ին,
Կրիլատսկիե խոլմի փողոցի N 21 տան մուտքի մօտ, որտեղ ապրում էր
վերջին տարիներին»,- յայտնել է Մոսկուայի իրավապահ մարմինների
ներկայացուցիչը:
Ականատեսների վկայութեամբ, անյայտ հանցագործը երեք անգամ
կրակել է Շեպիեւի գլխին, որից յետոյ թաքնվել:
Նախաքննութեան կարծիքով, Մոսկուայում Գրոզնու նախկին
փոխքաղաքապետի սպանութիւնը պատուիրուած բնոյթ ունի եւ ուղղակիօրէն
կապուած է իր անցեալ գործունէութեան հետ:
Շեպիեւի դէմ արդէն մահափորձ էր կատարուել 2006 թուականին: Այն
ժամանակ Գրոզնու կենտրոնում գնդակոծուել էր նրա մեքենան, ինչի
հետեւանքով նա ծանր վիրաւորուել էր: Դրանից յետոյ նա թողել էր իր
պաշտօնը եւ տեղափոխուել Մոսկուա: