ԵՐԵՎԱՆ, 12 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Երեւանում նոյեմբերի 12-ին իր աշխատանքը սկսեց Հայաստանի դեղագործութեան ոլորտի զարգացմանը նուիրուած համաժողովը: Երկօրեայ համաժողովում կքննարկուեն «Պատշաճ արտադրական գործունէութեան» (ՊԱԳ) հիմնական սկզբունքներին, Հայաստանում դրանց ներդրմանը, ինչպէս նաեւ ոլորտի զարգացմանը վերաբերող հարցեր: Ըստ Դեղերի եւ բժշկական տեխնալոգիաների փորձագիտական կենտրոնի տնօրէն Էմիլ Գաբրիէլեանի, այսօր շատ երկրներում ներմուծում կամ արտահանում են միայն միջազգայնօրէն ընդունուած ՊԱԳ-ի չափանիշներին համապատասխանող դեղորայք: ՊԱԳ-ը ապահովում է դեղորայքի արտադրութեան միջազգային չափանիշներին համապատասխանութիւնը եւ որակի վերահսկումը: Է.Գաբրիէլեանի համոզմամբ, Հայաստանում դեղերի արտադրութեան ոլորտը, ուր առկայ են բազմաթիւ խնդիրներ, լուրջ բարեփոխումների կարիք ունի: «Դեղը կարեւորագոյն առողջապահական գործօն է, այն բժշկի զենքն է: Այդ առումով յատուկ պահանջներ են առաջադրւում դրա արտադրութեան եւ օգտագործման համար»,- ասաց Է.Գաբրիէլեանը: Ըստ նրա, շատ ձեռնարկութիւններ չեն պահպանում արտադրութեան անհրաժեշտ պայմանները, ինչի արդիւնքում չի ապահովում արտադրանքի որակն ու անհրաժեշտ փաթեթավորումը: Նրա կանխատեսմամբ, եթէ ներկայիս վիճակը պահպանուի, ապա կգայ մի ժամանակ, երբ Հայաստանից ոչ մի երկիր դեղորայք չի գնի: «Միջազգային չափանիշների հետ համապատասխանութիւնը խիստ կարեւոր հանգամանք է Հայաստանի դեղագործական ոլորտի համար»,- նշեց ՄԶԳ-ի ֆինանսավորմամբ իրականացyող «Մրցունակ մասնաւոր հատուած Հայաստանում» (CAPS) ծրագրի մրցունակութեան աւագ փորձագէտ Ալան Սաֆֆերին: Ըստ նրա, ՊԱԳ-ի կիրառումը կնպաստի ոլորտի մրցունակութեան բարձրացմանը, քանի որ դեղորայքի տեղական արտադրողները բարելաւուած արտադրանքով հնարաւորութիւն կունենան աւելի արդիւնաւէտ մրցակցել ներմուծողների հետ եւ աւելի մեծ թւով երկրներ արտահանել իրենց արտադրանքը:

---