ԱՌԵՎՏՐԻ ԿԱԶՄԱԿԵՐՊՄԱՆ ՎԱՅՐԵՐՈՒՄ ՀԴՄ-ՆԵՐԻ ՆԵՐԴՐՄԱՆ
ԳՈՐԾԸՆԹԱՑՈՒՄ ԱՐԴԷՆ ՅԱՋՈՂՈՒԹԻՒՆՆԵՐ ԵՆ ԱՐՁԱՆԱԳՐՒՈՒՄ
17-10-2008 18:06:00 | Հայաստան | Տնտեսութիւն
ԵՐԵՎԱՆ, 17 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանում գրանցուած
առաւել խոշոր շուրջ 80 առեւտրի կազմակերպման վայրերում, ուր
գործում են 9144 վաճառատեղեր, հոկտեմբերի 17-ի դրութեամբ տեղադրուած
են 2900 ցանցային հսկիչ-դրամարկղային մեքենաներ (ՀԴՄ): Ինչպէս
նոյն օրուայ ասուլիսում նշեց ՀՀ Պետական եկամուտների կոմիտէի
նախագահի տեղակալ Արմէն Ալավերդեանը, ՀԴՄ ներկրող 5
ընկերութիւնները պատուիրել եւ առաջիկայում տոնավաճառներին
կտրամադրեն աւելի քան 4000 ցանցային դրամարկղային մեքենա: Ըստ նրա,
ներկրողների հետ առեւտրի կազմակերպիչների կնքած պայմանագրերով
պատուիրուած ՀԴՄ-ների թիւը 7302 է:
Ա.Ալավերդեանի խօսքերով, այդ թուերը վկայում են այն մասին, որ
որակական առումով լուրջ առաջընթաց է արձանագրուել մէկ ամիս առաջ
սկսուած ՀԴՄ-ների ներդրման գործընթացում: Նա միաժամանակ նշեց, որ
այն նոյն հաջողութեամբ չի ընթանում մարզկենտրոններում,
մասնաւորապէս, Արմաւիրում, Կոտայքում, Աբովեանում, Գյումիրում,
Վանաձորում եւ Մարտունիում:
Կոմիտէի նախագահի տեղակալը մէկ անգամ եւս յիշեցրեց, որ
առեւտրի կազմակերպման այն վայրերը, որոնք չեն բաւարարի
լիցենզաւորման համար անհրաժեշտ պայմանները, այդ թւում ՀԴՄ-ների
առկայութեան, կդադարեցնեն իրենց գործունէութիւնը: Նա յայտնեց, որ
արդէն առեւտրի կազմակերպման աւելի քան 20 վայրեր դադարեցրել են
իրենց գործունէութիւնը հենց այդ պատճառով:
Նշուեց նաեւ, որ կոմիտէի «թեժ գծով» ստացւում են բողոքներ այն
մասին, որ որոշ վայրերում վաճառողներին պարտադրում են իրենց
միջոցներով ձեռք բերել ՀԴՄ-ներ: Մինչդեռ, ըստ Ա.Ալավերդեանի, դրանք
պէտք է ձեռք բերեն առեւտրի իրականացման վայրերի կազմակերպիչները:
Ա.Ալավերդեանը յայտնեց, որ առեւտրի կազմակերպման վայրերում
ՀԴՄ-ների ներդրման գործընթացը նախատեսւում է աւարտել հոկտեմբերի
վերջերին: Ըստ նրա, գործընթացը հնարավորինս սեղմ ժամկէտներում
աւարտելու համար կոմիտէի մասնագէտները աջակցում են առեւտրի
իրականացման վայրերի կազմակերպիչներին եւ ՀԴՄ ներկրող
ընկերութիւններին: Նշուեց, որ ներկայումս քննարկւում են առեւտրի
իրականացման վայրերում տեղադրուած ՀԴՄ-ների ցանցի միջոցով տուեալների
ստացման տարբերակները: