ՀԱՅ ԱՇԽԱՏԱՆՔԱՅԻՆ ՄԻԳՐԱՆՏՆԵՐԻ ՇՈՒՐՋ 90%-Ը ՄԵԿՆՈՒՄ Է
ՌՈՒՍԱՍՏԱՆ
17-07-2008 17:00:00 | Հայաստան | Հասարակութիւն
ԵՐԵՎԱՆ, 17 ՅՈՒԼԻՍԻ, ՆՈՅԵԱՆ ՏԱՊԱՆ: Աշխատանքի միջազգային
կազմակերպութեան նախաձեռնութեամբ եւ Եւրոմիութեան ֆինանսական
աջակցութեամբ Երեւանում յուլիսի 17-ին կայացաւ «Հայաստանում
աշխատանքային միգրացիայի արդիւնաւէտ կառավարում. միգրացիա եւ
զարգացում, միգրացիա եւ դրամական փոխանցումներ» խորագրով
քննարկումը: Ինչպէս նշուած է կազմակերպիչների տարածած
յայտարարութիւնում, 1991-1998թթ.-ին Հայաստանից արտագաղթել է
շուրջ 760-780 հազար մարդ, ինչ կազմում է 1991թ.-ի դրութեամբ երկրի
բնակչութեան 20%-ը: 2002-2005թթ.-ին ԵԱՀԿ-ի կատարած
ուսումնասիրութիւնը ցոյց է տուել, որ աշխատանքային միգրանտների
շուրջ 90%-ն իբրեւ նպատակակէտ երկիր ընտրում են Ռուսաստանը,
մասնաւորապէս, ՌԴ-ի մայրաքաղաք Մոսկուան:
Հայաստանի արհմիութիւնների կոնֆեդերացիայի փոխնախագահ Բորիս
Խառատեանը նշեց, որ աշխատանքային միգրացիայի հիմնական պատճառներից
մէկը հայրենիքում աշխատանք չգտնելն է, միւսը` այն գտնելու դէպքում
էլ անբաւարար վաստակը: Գործատուների հանրապետական միութեան
գործադիր տնօրէն Գագիկ Մակարեանի խօսքերով, միութիւնը վերջին
տարիներին ջանքեր է գործադրում յատկապէս երիտասարդներին աշխատանքով
ապահովելու ուղղութեամբ, որպէսզի կանխվի նրանց հնարաւոր արտագաղթը:
Այդ նպատակով միութիւնը աջակցում է բարձրագոյն ուսումնական
հաստատութիւններ-գործատու մշտական կապի հաստատմանը: Գ.Մակարեանը
նշեց, որ գործատուները ցանկանում են աշխատանքի վերցնել ազնիւ եւ
պարտաճանաչ մասնագէտների: