ԱՌՈՂՋԱՊԱՀՈՒԹԵԱՆ ՆԱԽԱՐԱՐՈՒԹԵԱՆ ՆԵՐԿԱՅԱՑՈՒՑԻՉԸ ՎՍՏԱՀԵՑՆՈՒՄ Է,
ՈՐ ԱՅՍՕՐ ՀԱՆՐԱՊԵՏՈՒԹԻՒՆՈՒՄ ԽՄԵԼՈՒ ՋՐԻ ՀԵՏ ԿԱՊՈՒԱԾ ՈՐԵՒԷ ԽՆԴԻՐ
ՉԿԱՅ
07-11-2008 19:30:00 | Հայաստան | Հասարակութիւն
ԵՐԵՎԱՆ, 7 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Ներկայումս
հանրապետութեան խմելու ջրի մաքրման` քլորացման, կենտրոնացուած
համակարգը, ինչպէս նաեւ հնացած եւ ժանգոտված ջրատար խողովակների
ցանցը չեն ապահովում ջրի անհրաժեշտ որակը: Այս մասին նոյեմբերի
7-ին կայացած «Ջուրը եւ առողջութիւնը» քննարկմանը յայտնեց «Մգա
Վոթըր» ընկերութեան Հասարակայնութեան հետ կապերի բաժնի ղեկավար
Իրինա Բաղդյանը: Նշենք, որ «Մգա Վոթըր»-ը աւելի քան 5 տարի
հանրութեանը ներկայանում է իր «Մաքուր ջուր» ապրանքանիշով:
Ընկերութեան Մարկետինգի պատասխանատու Քնարիկ Վարդանեանի
խօսքերով, այսօր Հայաստանում բացակայում է պետութեան եւ մասնաւոր
սեկտորի միջեւ կապը: «Մեր նպատակն է ամրացնել այդ կապը, եւ ջրի հետ
կապուած իւրաքանչիւր հարցին մօտենալ գիտականօրէն, մասնագիտօրէն»,-
ընդգծեց նա:
ՀՀ Առողջապահութեան նախարարութեան Պետական հիգիենիկ եւ
հակահամաճարակային տեսչության Իրաւական ապահովման եւ փաստաթղթային
կառավարման բաժնի պետ Նունէ Բակունցի գնահատմամբ,
հանրապետութիւնում խմելու ջրի որակը իր բոլոր պարամետրերով
համապատասխանում է միջազգային չափանիշներին, քանի որ ջրի 90%-ը
ստացւում է լաւ պաշտպանուած ստորերկրյա աղբիւրներից: «Ներկայումս
մենք որեւէ անհանգստացնող իրավիճակ, ինչպէս նաեւ խմելու ջրի հետ
կապուած որեւէ խնդիրներ չունենք»,- նշեց նա:
Անդրադառնալով վերջին շրջանում Վանաձորում խմելու ջրի
աղտոտման հետեւանքով ինֆեկցիոն հիւանդութիւնների դէպքերին,
Ն.Բակունցը յայտնեց, որ նման դէպքերից խուսափելու նպատակով
հանրապետութիւնում իրականացւում է խմելու ջրի վերահսկողութիւն:
Այն, ըստ նրա, իրականացւում է նախարարի յանձնարարականով`
«Հայջրմուղ» ընկերութեան հետ համատեղ: