ՀՀ ՍՓԻՒՌՔԻ ՆԱԽԱՐԱՐՈՒԹԵԱՆ ՊԱՀՊԱՆՄԱՆ ՀԱՄԱՐ 2009 Թ.-Ի
ՊԵՏԲԻՒՋԷԻ ՆԱԽԱԳԾՈՎ ԿՅԱՏԿԱՑՈՒԻ 291 ՄԼՆ ԴՐԱՄ
28-10-2008 19:40:00 | Հայաստան | Տնտեսութիւն
ԵՐԵՎԱՆ, 28 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: ՀՀ 2009թ.-ի պետբիւջէի
նախագծով, Սփիւռքի նորաստեղծ նախարարութեան պահպանման համար
նախատեսուել է շուրջ 291 մլն դրամ, իսկ ծրագրերի իրականացման համար`
շուրջ 100 մլն դրամ: Ծրագրերի համար յատկացուած գումարների 51,5 մլն
դրամը նախատեսուած է Հայաստան-Սփիռք գործակցութեան միջոցառումների
իրականացման համար, որոնք ուղղուած են լինելու կրթական,
մշակոյթային, երիտասարդական ծրագրերին, Սփիւռքի կրթամշակութային
հաստատութիւնների գործունէութեան աջակցութեանը, ինչպէս նաեւ
կրթական որակի բարձրացմանը:
Ինչպէս ԱԺ մշտական յանձնաժողովների հոկտեմբերի 28-ի համատեղ
նիստում յայտնեց ֆինանսների նախարարի առաջին տեղակալ Պաւել
Սաֆարեանը, նախարարութիւնը ձեւաւորուել է ընթացիկ տարուայ հոկտեմբերի
1-ին, երբ բիւջէի նախագիծը արդէն ներկայացուել էր խորհրդարան,
ուստի նախարարութեան ծրագրերի ֆինանսաւորման խնդիրները անհրաժեշտ է
համատեղ քննարկել:
Ըստ սփիւռքի նախարար Հրանուշ Յակոբեանի, նախարարութեան
գլխաւոր առաքելութիւնն է համակարգել գործադիր իշխանութեան
մարմինների գործունէութիւնը Սփիռք-Հայրենիք գործակցութեան
ասպարէզում, ուստի պետբիւջէով նախատեսւող գումարները իրոք շատ
փոքր են այն իրականացնելու համար: Միեւնոյն ժամանակ նա նշեց, որ
ՀՀ նախագահի եւ վարչապետի հետ ձեռք է բերուել պայմանաւորուածութիւն
բացի պետբիւջէի յատկացումներից որոշակի հիմնադրամներից
իրականացնել մի շարք ծրագրերի ֆինանսավորումը: Առաջիկայում
իրականացուելիք ծրագրերից նախարարը յատկապէս կարեւորեց «Արի տուն»
ծրագիրը, որի շրջանակներում նախատեսւում է Հայաստան բերել 15-25
տարեկան տղաների եւ աղջիկների:
Քանի որ համակարգում կարող են աշխատել միայն քաղծառայողներ,
ուստի աշխատանքներ են տարւում սփիւռքահայերին նախարարութեան
աշխատանքներին պայմանագրային հիմունքով ներգրաւելու համար: Ըստ
Հ.Յակոբեանի, ՄԱԿ-ի հետ արդէն ստորագրուել է պայմանագիր եւ
յայտարարուել է մրցոյթ սփիւռքահայերին նախարարութեան
աշխատանքներին ներգրաւելու համար: Նա նաեւ տեղեկացրեց, որ
դեկտեմբերին նախատեսւում է անցկացնել կոնֆերանս` նուիրուած
1946-48թթ.-ի հայրենադարձութեանը, ինչը հնարաւորութիւն կտայ
վերլուծել վերջինիս դասերը` առաջիկայում հայրենադարձութեան ծրագիրը
մշակելու համար: