ԶԻՄԲԱԲՎԵԻ ՈՍՏԻԿԱՆՈՒԹԻՒՆԸ ՁԵՐԲԱԿԱԼԵԼ Է «ՆՅՈՒ ԵՈՐՔ ԹԱՅՄՍ»
ԹԵՐԹԻ ԹՂԹԱԿՑԻՆ
04-04-2008 15:17:00 | | Միջազգային
ՀԱՐԱՐԵ, 4 ԱՊՐԻԼԻ, ՆՈՅԵԱՆ ՏԱՊԱՆ: Զիմբաբվեի ոստիկանութիւնը
երկու արտասահմանցի լրագրողի է ձերբակալել առանց հաւատարմագրման
աշխատելու մեղադրանքով: Թղթակիցներից մէկը «Նյու Եորք թայմս» թերթի
աշխատակից, Աֆղանստանի պատերազմի մասին ռեպորտաժների համար 2002
թուականի Պուլիտցերյան մրցանակի դափնեկիր Բարրի Բիրաքն է: Երկրորդ
լրագրողի անունը եւ հպատակութիւնը առայժմ անյայտ է:
Ոստիկանութեան ներկայացուցիչը հաստատել է մայրաքաղաք
Հարարեում հինգշաբթի երեկոյեան արտասահմանցի լրագրողների
ձերբակալման մասին տեղեկութիւնը` յայտնելով, որ նրանք
կալանաւորուած են: Նա ասել է, որ թղթակիցներին հարցաքննում են առանց
համապատասխան արտօնութեան աշխատելու առնչութեամբ:
Զիմբաբվեի իշխանութիւնները արտասահմանեան ԶԼՄ-ների մեծ մասի
ներկայացուցիչներին թոյլ չեն տուել լուսաբանել համընդհանուր
ընտրութիւնները: Նրանք նախազգուշացրել էին, որ ամենակոշտ
միջոցներն են ձեռնարկելու բոլոր նրանց դէմ, ովքեր կփորձեն ապօրինի
ձեւով երկիր թափանցել: