ՎԱՇԻՆԳՏՈՆ, 31 ՄԱՐՏԻ, ՆՈՅԵԱՆ ՏԱՊԱՆ: ԱՄՆ-ի նախագահ Ջորջ Բուշը
այսօր ճանապարհւում է եւրոպական մեծ շրջագայութեան, որի ընթացքում
կայցելի Ուկրաինա, Ռումինիա, Խորվաթիա եւ Ռուսաստան, որտեղ կժամանի
ապրիլի 6-ին ՌԴ նախագահ Վլադիմիր Պուտինի հրաւէրով:
Ուղեւորութեան ընթացքում Բուշին կուղեկցեն Սպիտակ տանը
հաւատարմագրուած գրեթէ 70 լրագրողներ: Նրանցից շատերն արդէն առաջիկայ
ուղեւորութիւնը համարել են «հրաժեշտի», քանի որ մէկ տարուց էլ քիչ
ժամանակ անց ԱՄՆ-ում իշխանութեան կգայ նոր վարչակազմ: Ուրիշներն էլ
կարծում են, որ այն ամէնեւին այդպիսին չէ եւ որպէս փաստարկ բերում
այն փաստը, որ «կայանալու են ՆԱՏՕ-ի յոյժ կարեւոր գագաթնաժողովը
Ռումինիայում եւ նոյնքան նշանակալի հանդիպում Պուտինի հետ»: