ԵՐԵՎԱՆ, 16 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Յաջորդ տարուանից
«Նաիրիտ» գործարանը կաշխատի բուտադիենային տեխնոլոգիայով, քանի որ
բնական գազի գնի բարձրացման դէպքում ձեռնտու չէ կաուչուկն արտադրել
ացետիլենային եղանակով: Այս մասին հոկտեմբերի 16-ին լրագրողներին
յայտնեց «Նաիրիտի» խորհրդի նախագահի ժամանակաւոր պաշտօնակատար
Գրիգոր Ստեփանեանը: Ըստ նրա, ներկայումս ամէն ինչ արւում է
գործարանի նորմալ աշխատանքային ռիթմը վերականգնելու համար:
Նախատեսւում է տարեկան արտադրել 10 հազար տոննա կաուչուկ եւ այն
արտահանել Արեւմտյան Եւրոպայի երկրներ, ԱՄՆ, Ռուսասատան:
Ըստ Գ.Ստեփանեանի, ընկերութիւնը կատարում է իր պայմանագրային
պարտաւորութիւնները: Մասնաւորապէս, «Նաիրիտը» վճարել է իր ունեցած
բոլոր պարտքերը, այդ թւում նաեւ աշխատավարձի գծով:
Նա հերքեց վերջերս տարածուած լուրը, ըստ որի գործարանի
սեփականտեր լեհական «SAWEX» ընկերութիւնը պատրաստւում է հրաժարուել
իր բաժնետոմսերից: