ԱՅՍՕՐ ԱՇԽԱՏԱՆՔՆ Է ՍԿՍՈՒՄ ՄԱԿ-Ի ԳԼԽԱՒՈՐ ՎԵՀԱԺՈՂՈՎԻ 62-ՐԴ
ՆՍՏԱՇՐՋԱՆԸ
18-09-2007 18:33:00 | ԱՄՆ | Միջազգային
ՆՅՈՒ ԵՈՐՔ, 18 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Նյու Յորքում
Միաւորուած ազգերի կենտրոնակայանում սեպտեմբերի 18-ին իր աշխատանքն
է սկսում ՄԱԿ-ի Գլխաւոր վեհաժողովի հերթական 62-րդ նստաշրջանը:
Արեւելաեվրոպական պետութիւնների տարածաշրջանային խմբի
առաջարկութեամբ նրա նախագահ է ընտրուել Մակեդոնիայի արտաքին գործերի
նախկին նախարար Սրջան Քերիմը:
Ծրագրւում է, որ Վեհաժողովի նստաշրջանի ընթացքում կքննարկուի
օրակարգային աւելի քան 160 կէտ: Այդ թւում այնպիսի թեմաներ,
ինչպիսին են խաղաղութեան եւ անվտանգութեան ապահովումը,
ահաբեկչութեան դէմ պայքարը, մարդու իրաւունքների պաշտպանութիւնն
ու շրջակայ միջավայրի պահպանութիւնը, սոցիալական եւ տնտեսական
զարգացման հարցեր: ՄԱԿ-ի ԳՎ պատուիրակները կշարունակեն նախորդ
նստաշրջանների ընթացքում սկսուած հարցերի քննարկումը, որոնք
վերաբերում են ՄԱԿ-ի Անվտանգութեան խորհրդի բարենորոգմանը, բուն
կազմակերպութեան աշխատանքի ակտիւացմանը, ինչպէս նաեւ ՄԻԱՎ/ՁԻԱՀ-ի
դէմ պայքարին:
Ըստ աւանդոյթի նոր նստաշրջանի շրջանակում կանցկացուի
ընդհանուր քաղաքական բանավէճ: Այս անգամ այն կկայանայ սեպտեմբերի
25-ից մինչեւ հոկտեմբերի 5-ը: Սպասւում է, որ ընդհանուր
քննարկումների առաջին չորս օրերին ելոյթ կունենան 70-ից աւելի
պետութիւնների ղեկավարներ եւ 20 կառավարությունների ղեկավարներ:
Ընդհանուր քաղաքական բանավէճի առաջին օրը ՄԱԿ-ի ԳՎ-Ի ամբիոնից
ելոյթ կունենան այդ թւում ԱՄՆ-ի, Ֆրանսիայի, Բրազիլիայի, Իրանի եւ
Աֆղանստանի նախագահները: