ԹԱԼԻԲՆԵՐԸ ՊԱՏՐԱՍՏ ԵՆ ԱԶԱՏԵԼ ԿՈՐԵԱՑԻ ԲՈԼՈՐ ՊԱՏԱՆԴՆԵՐԻՆ
28-08-2007 17:30:00 | Աֆղանստան | Միջազգային
ՔԱԲՈՒԼ, 28 ՕԳՈՍՏՈՍԻ, ՆՈՅԵԱՆ ՏԱՊԱՆ: «Թալիբան» շարժումը
պատրաստ է ազատ արձակել 19 հարավկորեացի պատանդներին, հաղորդում է
«Ֆրանսպրես» գործակալութիւնը վկայակոչելով գրոհայինների
ներկայացուցչին: Ըստ նրա, թալիբների եւ Սեուլի պաշտօնական
ներկայացուցիչների միջեւ բանակցութիւնների վերջին փուլի ընթացքում
պայմանաւորուածութիւն է ձեռք բերուել պատանդների կեանքի դիմաց
Աֆղանստանից Հարաւային Կորեայի զորակազմի դուրսբերման մասին:
«Թալիբանի» պաշտօնական ներկայացուցիչ Յուսուֆ Ահմադին
հաստատել է, որ բանակցութիւնները եղել են յաջող, սակայն, թէ ինչով
են դրանք աւարտուել, թալիբը հրաժարուել է պատմել: Այդուհանդերձ,
Հարաւային Կորեայի նախագահի գրասենեակում յայտարարել են, որ
գրոհայինները իրոք համաձայնել են բաց թողնել 19 պատանդներին:
Յիշեցնենք, որ յուլիսի 19-ին թալիբները գրաւել էին կորեացի 23
միսիոներների աւտոբուսը: Նրանց ազատելու համար գրոհայինները
պահանջում էին Աֆղաստանից դուրս բերել Հարաւային Կորեայի
զինվորներին, ինչպէս նաեւ բանտերից ազատել իրենց կողմնակիցներին: