ԽԱՎԻԵՐ ՍՈԼԱՆԱՆ ՀԱՄԱՐՈՒՄ Է, ՈՐ ԿՈՍՈՎՈՅԻ ԱՆԿԱԽՈՒԹԻՒՆԸ ՉԻ
ԿԱՐՈՂ ՆԱԽԱԴԷՊ ԴԱՌՆԱԼ ԱՇԽԱՐՀԻ ԱՆՋԱՏՈՂԱԿԱՆ ՌԵԺԻՄՆԵՐԻ ՀԱՄԱՐ
02-08-2007 18:20:00 | Հայաստան | Միջազգային
ԲՐԻՒՍԷԼ, 2 ՕԳՈՍՏՈՍԻ, ՆՈՅԵԱՆ ՏԱՊԱՆ: Եւրոպական միութեան
արտաքին կապերի գերագոյն յանձնակատար Խավիեր Սոլանան համարում է,
որ անկախութեան կարգավիճակի շնորհումը Կոսովոյին չի կարող նախադէպ
դառնալ աշխարհի տարբեր երկրների անջատողական ռեժիմների համար:
«Կոսովեան հարցը այնպիսի հարց է, որը չի կարող համեմատվել որեւէ
այլ տարածաշրջանի իրադրութեան հետ»,- յայտարարել է Սոլանան
«Թրենդին» տուած բացառիկ հարցազրոյցում:
Սոլանան ափսոսանք է արտայայտել այն առնչութեամբ, որ Կոսովոյի
խնդրին վերաբերող խաղաղ համաձայնութիւն այդպէս էլ ձեռք չբերուեց
ՄԱԿ-ի Անվտանգութեան խորհրդի շրջանակում: «Կարծում եմ, իրավիճակից
լաւագոյն ելքը այժմ կլինի եւս մի շանս ընձեռել
բանակցութիւններին: Դա սկզբունքօրէն հենց այն է, ինչին հանգել են
ԵՄ նախարարները յուլիսի 23-ի հանդիպմանը»,- ասել է հանձնակատարը:
Այդուամենայնիւ, նա նշել է, որ այդ բանակցութիւնները չեն
կարող անվերջ շարունակուել, եւ պէտք է եզրափակվեն 120 օրուայ
սահմաններում: «Ես դիմում եմ Բելգրադին եւ Պրիշտինային ակտիւօրէն
եւ կառուցողականորեն բանակցութիւնների եզրափակիչ շրջափուլում
ներգրաւուելու խնդրանքով: ԵՄ-ն ուզում է այդ գործընթացը առաջ մղել
եւ տեւական լուծում գտնել Կոսովոյի կարգավիճակի հարցին: Մենք շեշտը
դնում ենք այդ հարցում կարծիքների ընդհանրության վրայ` եւրոպական
շահերի պաշտպանութեան, ինչպէս նաեւ Բալկաններում եւրոպական ապագայի
կայունութեան եւ բարգաւաճման համար»,- ընդգծել է Սոլանան: