ԵՐԵԽԱՆԵՐԻ ԻՐԱՒՈՒՆՔՆԵՐԻ ՊԱՇՏՊԱՆՈՒԹԵԱՆ ԲԱԺԻՆՆԵՐԸ ՀԻՄՆԱԿԱՆՈՒՄ
ՍՏԱՆՈՒՄ ԵՆ ՍՈՑԻԱԼԱԿԱՆ ԲՆՈՅԹԻ ԴԻՄՈՒՄՆԵՐ
10-07-2007 17:25:00 | Հայաստան | Հասարակութիւն
ԵՐԵՎԱՆ, 10 ՅՈՒԼԻՍԻ, ՆՈՅԵԱՆ ՏԱՊԱՆ: Երեխաների իրաւունքների
պաշտպանութեան ազգային յանձնաժողովը, ուր ընդգրկուած են տարբեր
գերատեսչութիւնների ներկայացուցիչներ, համակարգում է Հայաստանում
երեխաների իրաւունքների պաշտպանութեանն ուղղուած աշխատանքները:
Ինչպէս «ՆՈՅԵԱՆ ՏԱՊԱՆ»-ի թղթակցին յայտնեց ՀՀ Աշխատանքի եւ
սոցիալական հարցերի նախարարութեան Ընտանիքի, կանանց եւ երեխաների
հիմնահարցերի վարչութեան Երեխաների հիմնահարցերի բաժնի պետ Լենա
Հայրապետեանը, տեղերում այդ աշխատանքներն իրականացնելու նպատակով
2006թ.-ի ապրիլին Երեւանի քաղաքապետարանում եւ բոլոր
մարզպետարաններում ստեղծուել են համապատասխան բաժիններ: Դրանք, ըստ
նրա, մասնաւորապէս, զբաղւում են դժուվար իրավիճակներում գտնուող,
առանց ծնողական խնամքի մնացած երեխաների հիմնախնդիրների լուծմամբ,
ինչպէս նաեւ այդ երեխաներին տարբեր յատուկ հաստատութիւններ
տեղավորելու կամ ընտանիք վերադարձնելու հարցերով:
Լ.Հայրապետեանը նշեց, որ, ըստ կանոնադրութեան, ամէն տարի այդ
բաժինները պէտք է հաշուէտւութիւն ներկայացնեն յանձնաժողովին: Մինչ
օրս ունեցած տուեալների համաձայն, բաժինները հիմնականում ստանում են
սոցիալական բնոյթի դիմումներ, մասնաւորապէս բազմազաւակ
ընտանիքներին աջակցելու, երեխայի ամառային հանգիստը կազմակերպելու
վերաբերեալ: Ըստ Լ.Հայրապետեանի, ստացուել են նաեւ երեխաների հանդէպ
բռնութեան դէպքերի վերաբերեալ բողոքներ, որոնք սակայն այնքան էլ
շատ չեն:
Նշուեց նաեւ, որ այդ բաժիններում աշխատում են բժիշկներ,
մանկավարժներ, հոգեբաններ, սոցաշխատողներ եւ իրաւաբաններ: Ըստ
Լ.Հայրապետեանի, բաժինների աշխատակիցների համար կազմակերպւում են
վերապատրաստման դասընթացներ: