ԲՐԻՒՍԷԼ, 25 ՅՈՒՆԻՍԻ, ՆՈՅԵԱՆ ՏԱՊԱՆ: Եւրամիութիւնը
2007-2009թթ. տնտեսական օգնութեան ծրագրի շրջանակում Միութեան
թեկնածու եւ հաւանական թեկնածու պետութիւններին կտրամադրի 3,961
միլիարդ եւրօ:
Այս ծրագրի համաձայն, երկու տարուայ ընթացքում Խորւաթիան կստանայ
438,5 միլիոն եւրօ, Մակեդոնիան` 210,4, Ալբանիան` 212,9, Բոսնիա-
Հերցեգովինան` 226, Չերնոգորիան` 97,3 եւ Սերբիան` 572,4 մլն եւրօ:
Գումարները նախատեսւում է ծախսել այդ պետութիւններում` տնտեսական
եւ սոցիալական աճի ապահովման, ինչպէս նաեւ ԵՄ օրենսդրութիւնը
կեանքի կոչելու եւ Միութեան չափանիշներին մօտ կանգնելու համար:
Ըստ ծրագրի, 199,1 միլիոն եւրօ էլ կստանայ Կոսովոն:
Ֆինանսական օգնութեան առիւծի բաժինը` 1,602 միլիարդ եւրօ,
կստանայ Թուրքիան, ինչը նախատեսւում է տրամադրել երկրում մարդու
իրաւունքների եւ ազատութիւնների, ժողովրդավարութեան զարգացման ու
ազգային փոքրամասնությունների իրաւունքների պաշտպանութեան
բնագաւառներին:
Դրանից բացի, 2007-09թթ. 402,7 մլն եւրօ էլ կտրամադրուի
տարածաշրջանային համագործակցութեան, տնտեսութեան եւ առեւտրի,
կրթութեան, երիտասարդության եւ այլ բնագաւառներում ծրագրերի
իրագործմանը: