ԱՆՎՃԱՐ ԱՄԲՈՒԼԱՏՈՐ ԾԱՌԱՅՈՒԹԻՒՆՆԵՐԻՑ ՕԳՏՈՒԵԼՈՒ ՀԱՄԱՐ ՄԻՆՉԵՒ
ՏԱՐԵՎԵՐՋ ՔԱՂԱՔԱՑԻՆԵՐԸ ՊԷՏՔ Է ԳՐԱՆՑՈՒԵՆ ԱԱՊ ՀԱՄԱԿԱՐԳՈՒՄ
16-04-2007 17:53:00 | Հայաստան | Հասարակութիւն
ԾԱՂԿԱՁՈՐ, 16 ԱՊՐԻԼԻ, ՆՈՅԵԱՆ ՏԱՊԱՆ: Հայաստանում առողջութեան
առաջնային պահպանման (ԱԱՊ) համակարգում ապրիլի 1-ից սկսուել են
բնակչութեան գրանցման համակարգի ներդմանն ուղղուած աշխատանքները:
Դրա շնորհիւ իւրաքանչիւր քաղաքացի հնարաւորութիւն կունենայ
ընտրել իր ԱԱՊ բժշկին: Նոր համակարգի շրջանակներում բնակիչները
կարող են գրանցուել ընտանեկան բժիշկների, թերապեւտների, իսկ
անչափահասները` մանկաբույժների մօտ:
Ինչպէս ապրիլի 13-ին Ծաղկաձորում կազմակերպուած սեմինարի
ժամանակ յայտնեց ՀՀ Առողջապահութեան նախարարութեան Առողջութեան
բարեփոխման եւ բնակչութեան գրանցման թիմի ղեկավար Գայեանէ
Ղարագեբակյանը, եթէ քաղաքացիները մինչեւ տարեվերջ չգրանցվեն, ապա
կզրկուեն անվճար ամբուլատոր ծառայութիւններ ստանալու
հնարաւորութիւնից: Ըստ նրա, համակարգը կներդրուի փուլերով. ապրիլի
1-ից հոկտեմբերի 1-ը բնակիչն ԱԱՊ իր բժշկին կընտրի այն
բուժհաստատությունից, որտեղ նա ներկայումս սպասարկւում է, իսկ
հոկտեմբերից 1-ից` ցանկությամբ դէպքում կարող է տարին 2 անգամ
փոխել բժշկին:
Նախարարութեան Առաջնային բուժօգնութեան բաժնի պետ Ռուզաննա
Յուզբաշեանը նշեց, որ տարէցտարի աճում են ԱԱՊ համակարգին
պետբիւջէից յատկացւող գումարները: Այսպէս, եթէ 2005թ.-ին
յատկացուել էր 9,3 մլրդ դրամ, ապա 2007թ.-ին` 16,726 մլրդ դրամ (մօտ
46,5 մլն ԱՄՆ դոլար):