ՀՀ ԱԺ-Ն ԱՌԱՋԻՆ ԸՆԹԵՐՑՄԱՄԲ ՓՈՓՈԽՈՒԹԻՒՆՆԵՐ ԿԱՏԱՐԵՑ
«ՀԵՌՈՒՍՏԱՏԵՍՈՒԹԵԱՆ ԵՎ ՌԱԴԻՈՅԻ ՄԱՍԻՆ» ՕՐԷՆՔՈՒՄ
21-02-2007 20:10:00 | Հայաստան | Հասարակութիւն
ԵՐԵՎԱՆ, 21 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Փետրուարի 21-ի արտահերթ
նիստում ՀՀ Ազգային Ժողովն առաջին ընթերցմամբ ընդունեց
«Հեռուստատեսութեան եւ ռադիոյի մասին» եւ «Հեռուստատեսութեան եւ
ռադիոյի ազգային յանձնաժողովի կանոնակարգ» օրէնքներում
փոփոխութիւններ եւ լրացումներ նախատեսող փաթեթը: Այն բխում է
սահմանադրական փոփոխություններին համապատասխանեցնելու
անհրաժեշտութիւնից` կապուած ՀՌԱՀ-ի կազմաւորման եւ անդամների
լիազօրութիւնների դադարեցման կարգերի հետ:
Ըստ այդմ ամրագրւում է, որ ՀՌԱՀ-ը անկախ կարգաւորող պետական
մարմին է, որի անդամների կէսը 6 տարի ժամկէտով ընտրվում է ԱԺ-ի
կողմից, իսկ միւս կէսը նոյնքան ժամկէտով նշանակւում ՀՀ նախագահի
կողմից: Ներկայումս գործող ՀՌԱՀ-ը կազմուած է ՀՀ նախագահի կողմից
նշանակուած 9 անդամից:
Նախագծի անցումային դրոյթներով նախատեսւում է, որ մինչեւ
յանձնաժողովի կազմը 8 անդամ դառնալը յանձնաժողովի ներկայիս
անդամները շարունակելու են պաշտոնավարել մինչեւ իրենց
լիազօրութիւնների ժամկէտի աւարտը: Մինչ յանձնաժողովի կազմը 8
անդամ դառնալը թափուր տեղ առաջանալու դէպքում նոր անդամ չի
նշանակուելու կամ ընտրուելու: Յետագայում յանձնաժողովում թափուր տեղի
առկայութեան դէպքում նշանակումները կատարուելու են ըստ
հերթականության` մէկ անգամ ԱԺ-ի որոշմամբ, միւս անգամ` ՀՀ
Նախագահի հրամանագրով: