Ասիական քրիստոնեական կոնֆերանսի մասնակիցներն այցելել են
Կալկաթայի Սբ. Գրիգոր Լուսաւորիչ հայկական եկեղեցի
26-10-2009 18:05:00 | | Հասարակութիւն
ԿԱԼԿԱԹԱ, 26 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Հոկտեմբերի 19-ից 29-ը Կալկաթայում ընթանում են Ասիական
քրիստոնեական կոնֆերանսի էկումենիկ ծրագրի 2009թ. դասընթացները`
«Միասին ապրել Աստծոյ տան մէջ» թեմայով, որին մասնակցում են Ասիական
երկրների քրիստոնեական եկեղեցիների եւ կազմակերպութիւնների
ներկայացուցիչներ: Ասիական քրիստոնեական կոնֆերանսի հրաւէրով
առաջին անգամ Հայ Առաքելական Սուրբ Եկեղեցու կողմից դասընթացին
մասնակցում եւ Հայոց Եկեղեցին ներկայացնում էր Կալկաթայի Հայոց
Մարդասիրական ճեմարանի վարչական տնօրէն Աւետիս քահանա
Համբարձումեանը: Ծրագիրն ընդգրկում էր նաեւ այցելութիւն եւ
ծանոթութիւն տարածաշրջանի տարբեր եկեղեցիներին, այդ թւում նաեւ
Հայ Առաքելական Սուրբ եկեղեցի:
Ինչպէս յայտնում են Կալկաթայի Հայոց մարդասիրական ճեմարանից,
հոկտեմբերի 25-ին ծրագրի ղեկավարներ` դոկտ. Հոպ Ս. Անտոնի եւ դոկտ.
Լոնգչար Վատիյի գլխաւորութեամբ, մասնակիցները այցելեցին Կալկաթայի
Սբ. Գրիգոր Լուսաւորիչ հայկական եկեղեցի` ներկայ գտնուելու Սուրբ
Պատարագին եւ մօտիկից ծանօթանալու Հայ եկեղեցուն: Օրուայ պատարագիչն
էր Տեր Աւետիս քահանան: Նախքան պատարագի սկսուելը, Տեր հայրը բարի
գալուստ մաղթեց հիւրերին` նշելով, որ Հայ Առաքելական Սուրբ
եկեղեցին նույնպես ակտիւօրէն մասնակցում եւ մեծ հետաքրքրութիւն է
ցուցաբերում էկումենիկ շարժմանը, ձգտելով առաւել սերտ կապեր
հաստատել քրիստոնեական քույր եկեղեցիների եւ հարանվանությունների
հետ: Պատարագի աւարտին հիւրերը առիթ ունեցան նաեւ զրուցելու Հայոց
Մարդասիրական ճեմարանի սաների հետ եւ ծանօթանալու նրանց առօրեային: