Հայաստանի ԿԲ-ն վերաֆինանսաւորման տոկոսադրույքը նուազեցրեց
0,25%-ով կէտով եւ այն սահմանեց 7,5%
07-04-2009 18:10:00 | Հայաստան | Տնտեսութիւն
ԵՐԵՎԱՆ, 7 ԱՊՐԻԼԻ, ՆՈՅԵԱՆ ՏԱՊԱՆ: 2009թ.-ի ապրիլի 7-ի նիստում
ՀՀ ԿԲ խորհուրդը նուազեցրեց վերաֆինանսաւորման տոկոսադրույքը
0,25%-ով` սահմանելով այն 7,5%:
Ըստ ՀՀ ԿԲ Հասարակայնութեան հետ կապերի ծառայութեան, 2009թ.-ի
մարտին փետրուարի նկատմամբ արձանագրուել է 1,4% գնաճ, որի պարագայում
12-ամսեայ գնաճը նախորդ ամսուայ նկատմամբ չի փոփոխուել` կազմելով 1%:
ՀՀ ԿԲ խորհուրդը փաստել է, որ չնայած ՀՀ դրամի մարտ ամսուայ
ընթացքում արձանագրուած արժեզրկմանը` համաշխարհային պահանջարկի
կրճատման հետեւանքով ձեւաւորուած արտաքին գնանկումային միջավայրի
պահպանման եւ ներքին պահանջարկի շարունակւող նուազման պայմաններում
գնաճը ձեւաւորուել է կանխատեսուածից աւելի ցածր մակարդակում:
Միաժամանակ, արտաքին պահանջարկի նշանակալի կրճատման, ֆինանսական
ներհոսքի թուլացման շարունակւող միտումները եւ առեւտրի պահպանուող
անբարենպաստ պայմաններն անդրադարձել են տնտեսական անկման տեմպերի
արագացման վրայ:
Խորհուրդը միակարծիք է, որ ձեւաւորուած ու կանխատեսւող
մակրոտնտեսական զարգացումների պայմաններում, գնաճի նպատակի
իրագործման եւ տնտեսական ակտիվությանն աջակցելու խնդիրների խելամիտ
համադրումը ենթադրում է ընդլայնողական դրամավարկային
քաղաքականութեան իրականացում: Այս առումով առաւել արդիւնաւէտ է
համարուել տոկոսադրույքների նուազեցման եւ փողի ծաւալային ընդլայնման
համակցումը: