Հայաստանի պետբիւջէի եկամուտները 2009թ.-ի յունուար-փետրուարին
2008թ.-ի նոյն ամիսների համեմատ 14,6%-ով նուազել են
27-03-2009 22:20:00 | Հայաստան | Տնտեսութիւն
ԵՐԵՎԱՆ, 27 ՄԱՐՏԻ, ՆՈՅԵԱՆ ՏԱՊԱՆ: 2009թ.-ի յունուար-փետրուարին
ՀՀ պետական բիւջէի եկամուտները կազմել են աւելի քան 84,6 մլրդ
դրամ (մօտ 228,6 մլն ԱՄՆ դոլար), իսկ ծախսերը` 98,9 մլրդ դրամ,
որոնց գծով ապահովել է ՀՀ կառավարութեան կողմից հաստատուած
եռամսյակային ծրագրի, համապատասխանաբար 45,6%-ը եւ 50,3%-ը:
Պետական բիւջէի տարեկան ծրագրային ցուցանիշները կատարուել են
եկամուտների գծով` 9,5%-ով, ծախսերի գծով` 11,1%-ով:
Ըստ ՀՀ Ֆինանսների նախարարութեան Տեղեկատուութեան եւ
հասարակայնութեան հետ կապերի բաժնի, նախորդ տարուայ նոյն
ժամանակահատուածի համեմատ պետական բիւջէի եկամուտները նուազել են
14,6%-ով կամ 14,4 մլրդ դրամով. մասնաւորապէս, 17,5%-ով (14,3 մլրդ
դրամով) նուազել են հարկերը եւ տուրքերը, 5,4%-ով կամ 729,9 մլն
դրամով` պարտադիր սոցիալական ապահովութեան վճարները, իսկ
պաշտօնական դրամաշնորհները եւ այլ եկամուտներն աճել են,
համապատասխանաբար, 52,9 մլն դրամով եւ 546,5 մլն դրամով:
Պետական բիւջէի եկամուտների 79,9%-ը ձեւաւորուել է հարկերի եւ
տուրքերի, 15,1%-ը` պարտադիր սոցիալական ապահովութեան վճարների,
5%-ը` այլ եկամուտների եւ 0,1%-ը` պաշտօնական դրամաշնորհների
հաշուին: «Հայաստանի Հանրապետութեան 2009 թուականի պետական բիւջէի
մասին» ՀՀ օրէնքի 9-րդ յօդուածի 18-րդ կէտին համապատասխան պետական
բիւջէում ներառվել են նաեւ պետական հիմնարկների արտաբիւջէտային
ֆոնդերի միջոցները, որոնց եկամուտները հաշուետու ժամանակահատուածում
կազմել են 2,2 մլրդ դրամ` նախորդ տարուայ 2 մլրդ դրամի դիմաց: