Հայաստանի պետբյուջեի եկամուտները 2009թ.-ի հունվար-փետրվարին
2008թ.-ի նույն ամիսների համեմատ 14,6%-ով նվազել են
27-03-2009 22:20:00 | Հայաստան | Տնտեսություն
ԵՐԵՎԱՆ, 27 ՄԱՐՏԻ, ՆՈՅՅԱՆ ՏԱՊԱՆ: 2009թ.-ի հունվար-փետրվարին
ՀՀ պետական բյուջեի եկամուտները կազմել են ավելի քան 84,6 մլրդ
դրամ (մոտ 228,6 մլն ԱՄՆ դոլար), իսկ ծախսերը` 98,9 մլրդ դրամ,
որոնց գծով ապահովվել է ՀՀ կառավարության կողմից հաստատված
եռամսյակային ծրագրի, համապատասխանաբար 45,6%-ը եւ 50,3%-ը:
Պետական բյուջեի տարեկան ծրագրային ցուցանիշները կատարվել են
եկամուտների գծով` 9,5%-ով, ծախսերի գծով` 11,1%-ով:
Ըստ ՀՀ Ֆինանսների նախարարության Տեղեկատվության եւ
հասարակայնության հետ կապերի բաժնի, նախորդ տարվա նույն
ժամանակահատվածի համեմատ պետական բյուջեի եկամուտները նվազել են
14,6%-ով կամ 14,4 մլրդ դրամով. մասնավորապես, 17,5%-ով (14,3 մլրդ
դրամով) նվազել են հարկերը եւ տուրքերը, 5,4%-ով կամ 729,9 մլն
դրամով` պարտադիր սոցիալական ապահովության վճարները, իսկ
պաշտոնական դրամաշնորհները եւ այլ եկամուտներն աճել են,
համապատասխանաբար, 52,9 մլն դրամով եւ 546,5 մլն դրամով:
Պետական բյուջեի եկամուտների 79,9%-ը ձեւավորվել է հարկերի եւ
տուրքերի, 15,1%-ը` պարտադիր սոցիալական ապահովության վճարների,
5%-ը` այլ եկամուտների եւ 0,1%-ը` պաշտոնական դրամաշնորհների
հաշվին: «Հայաստանի Հանրապետության 2009 թվականի պետական բյուջեի
մասին» ՀՀ օրենքի 9-րդ հոդվածի 18-րդ կետին համապատասխան պետական
բյուջեում ներառվել են նաեւ պետական հիմնարկների արտաբյուջետային
ֆոնդերի միջոցները, որոնց եկամուտները հաշվետու ժամանակահատվածում
կազմել են 2,2 մլրդ դրամ` նախորդ տարվա 2 մլրդ դրամի դիմաց: