ԱՄՀ-ը հաստատելու է 540 մլն դոլար գումարով 28-ամսեայ
պահուստային վարկաւորման համաձայնագրի մասին Հայաստանի դիմումը
03-03-2009 16:06:00 | Հայաստան | Տնտեսութիւն
ԵՐԵՎԱՆ, 3 ՄԱՐՏԻ, ՆՈՅԵԱՆ ՏԱՊԱՆ: Արժոյթի միջազգային
հիմնադրամի (ԱՄՀ) կառավարիչ-տնօրէն Դոմինիկ Ստրաուս-Քանը
առաջարկելու է ԱՄՀ-ի Գործադիր խորհրդին հաստատել 540 մլն դոլար
գումարով, 28-ամսեայ պահուստային վարկաւորման համաձայնագրի
(Stand-By Arrangement) մասին Հայաստանի դիմումը: Իր այս որոշումը
մարտի 3-ի յայտարարութիւնում ԱՄՀ-ի կառավարիչ-տնօրէնը հիմնաւորել
է այն հանգամանքով, ի պատասխան համաշխարհային տնտեսական եւ
ֆինանսական ճգնաժամի բացասական ազդեցութեան «Հայաստանի
իշխանութիւնները կազմել են կենսունակ եւ վստահելի տնտեսական
ծրագիր` Հայաստանի արտաքին հեռանկարների վատթարացման, արժոյթի եւ
ֆինանսական համակարգի նկատմամբ վստահութեան վերականագնման եւ աղքատ
խաւի պաշտպանութեան խնդիրներին անդրադառնալու համար»:
Ըստ ԱՄՀ-ի մամլոյ հաղորդագրութիւն, ակնկալւում է, որ Գործադիր
խորհուրդն այս շաբաթուայ վերջում նիստ կգումարի` ծրագիրը քննարկելու
համար: Խորհրդի հաստատումից յետոյ Հայաստանը կկարողանայ անմիջապէս
փոխառել շուրջ 239 մլն ԱՄՆ դոլար:
ԱՄՀ-ի աշխատակիցների հետ խորհրդակցելով Հայաստանի
իշխանութիւնների մշակած քաղաքականութեան համակողմանի փաթեթը
ներառում է վերադարձը լողացող փոխարժէքի ռեժիմին (թոյլ տալով, որ
փոխարժեքը փոփոխվի շուկայի հիմնարար սկզբունքներին համապատասխան`
արտաքին ցնցումներից տնտեսութիւնը պաշտպանելու եւ արտարժութային
պահուստները պահպանելու նպատակով), ինչպէս նաեւ դրամավարկային,
հարկաբիւջետային եւ ֆինանսական ոլորտների օժանդակող
քաղաքականութիւն եւ խիստ հասցեական կառուցուածքային բարեփոխումներ:
Ըստ ԱՄՀ-ի, Հայաստանի իշխանութիւնները նաեւ ձեռնարկում են
տնտեսական անկումը չէզոքացնելու եւ աղքատ խաւի վրայ տնտեսական
ճգնաժամի ազդեցութիւնը մեղմելու միջոցառումներ:
«Իշխանութիւնների կողմից ձեռնարկւող վճռական միջոցառումները
հիմնաւորում են Հիմնադրամի միջոցների հասանելիութեան բացառիկ
մակարդակը (որը համարժէք է Հայաստանի քվոտայի 400 տոկոսին) եւ
արժանի են միջազգային հանրութեան օժանդակությանը»,- նշել է
Դ.Ստրասուս-Քանը: