ԱՐԱՐԱՏԻ ՄԱՐԶՈՒՄ ԿՍՏԵՂԾՈՒԻ «ԽՈՐ ՎԻՐԱՊ» ՊԵՏԱԿԱՆ ԱՐԳԵԼԱՎԱՅՐԸ
25-01-2007 20:40:00 | Հայաստան | Հասարակութիւն
ԵՐԵՎԱՆ, 25 ՅՈՒՆՎԱՐԻ, ՆՈՅԵԱՆ ՏԱՊԱՆ: «Բնութեան յատուկ
պահպանուող տարածքների մասին» եւ «Պետական ոչ առեւտրային
կազմակերպութիւնների մասին» ՀՀ օրէնքներին համապատասխան, յունվարի
25-ի նիստում ՀՀ կառավարութիւնը որոշում է ընդունել Արարատի մարզի
Փոքր Վեդի գիւղական համայնքի վարչական սահմաններում գտնուող,
պետական սեփականութիւն հանդիսացող 50,28 հա խոնաւ տարածքում
ստեղծել «Խոր Վիրապ» պետական արգելավայր` ներառելով այն
«Միջազգային նշանակութիւն ունեցող, հիմնականում որպէս ջրային
թռչունների բնակավայր, խոնաւ տարածքների մասին» կոնվենցիայի
Միջազգային նշանակութեան խոնաւ տարածքների ցանկում:
Ըստ ՀՀ կառավարութեան Տեղեկատուութեան եւ հասարակայնութեան հետ
կապերի վարչութիւնից «ՆՈՅԵԱՆ ՏԱՊԱՆ»-ին տրամադրած
հաղորդագրութեան, որոշումն ընդունուել է խոնաւ տարածքի
էկոհամակարգի, դրա բաղադրիչների, բուսական ու կենդանական տեսակների
պահպանութիւնը, բնականոն զարգացումը, վերարտադրությունն ու կայուն
օգտագործումը ապահովելու նպատակով: