ՀՀ ԱԳՆ-ում անցկացուել են հայ-կորէական քաղաքական խորհրդակցութիւններ
16-09-2011 18:03:22 | Հայաստան | Քաղաքական
Սեպտեմբերի 16-ին Երեւանում տեղի ունեցան քաղաքական խորհրդակցութիւններ Հայաստանի Հանրապետութեան ու Կորեայի Հանրապետութեան արտաքին քաղաքական գերատեսչութիւնների միջեւ:
Հայկական կողմից պատուիրակութիւնը գլխաւորում էր ՀՀ ԱԳ նախարարի տեղակալ Սերգեյ Մանասարեանը, կորեական կողմից` Կորեայի արտաքին գործերի եւ առեւտրի նախարարութեան Եւրոպայի բիւրոյի գլխաւոր տնօրէն Լի Վուկ-հէոն:
Խորհրդակցութիւնների ընթացքում կողմերը քննարկեցին երկկողմ յարաբերութիւններին առնչուող հարցերի լայն շրջանակ, մասնաւորապէս` բարձրաստիճան պաշտօնեաների փոխայցելութիւնների, առեւտրատնտեսական, մշակութային կապերի ակտիւացումը, իրաւապայմանագրային դաշտի զարգացումը, ինչպէս նաեւ միջազգային կազմակերպութիւնների շրջանակներում իրականացուող երկկողմ համագործակցութիւնը:
Հանդիպմանն անդրադարձ կատարուեց նաեւ տարածաշրջանային խնդիրներին: Այդ համատեքստում փոխարտգործնախարար Մանասարեանը հիւրերին ներկայացրեց արցախեան հիմնախնդրի կարգաւորման գործընթացի վերջին զարգացումները: