Կառավարութեան նոյեմբերի 10-ի նիստում ՀՀ կառավարութիւնն իր նախկին որոշումներից մէկում կատարել է լրացում, ինչը պայմանաւորուած է ՀՀ տնտեսական մրցակցութեան պաշտպանութեան պետական յանձնաժողովին վերապահուած լիազօրութիւնների իրականացման համար անհրաժեշտ տեղեկատուութեան ապահովմամբ: Այսուհետեւ յանձնաժողովը հնարաւորութիւն կ'ունենայ ապրանքային շուկաների ուսումնասիրութեան, այդ շուկաներում հակամրցակցային համաձայնութիւնների, գերիշխող դիրքի առկայութեան եւ օրէնքով սահմանուած այլ դրսեւորումների բացայայտման համար հարկային ծառայութեան մարմիններից տուեալ ապրանքային շուկաների եւ դրանց մասնակիցների վերաբերեալ ստանալ անհրաժեշտ տեղեկութիւններ: Ըստ կառավարութեան Տեղեկատուութեան եւ հասարակայնութեան հետ կապերի վարչութեան հաղորդագրութեան, գործադիրն իր նախկին որոշումներից մէկում կատարել է փոփոխութիւններ եւ լրացումներ, որոնք համահունչ են Եւրոպայի բարձրագոյն կրթութեան միասնական տարածքի կրթական բարեփոխումներին: Մասնաւորապէս, այսուհետեւ երկրում կադրեր կը պատրաստուեն հասարակայնութեան հետ կապերի (PR), «ակտուար մաթեմատիկա», «անվտանգային գիտութիւններ», «ոստիկանական գործ», «կովկասագիտութիւն»եւ մի շարք այլ մասնագիտութիւններով: 2011 թ. նոյեմբերի 4-11-ը Հայաստանում Եգիպտոսի մշակոյթի օրերի կազմակերպման եւ անցկացման նպատակով կառավարութիւնը ՀՀ մշակոյթի նախարարութեանը յատկացրել է աւելի քան 17 մլն դրամ:

---