ԼՂՀ-ը շահագրգռուած է խորացնել յարաբերութիւնները Եւրոպայի եւ այն ներկայացնող տարբեր կառոյցների հետ
29-10-2010 16:28:00 | Հայաստան | Քաղաքական
ՍՏԵՓԱՆԱԿԵՐՏ, 29 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Լեռնային Ղարաբաղի հանրապետութեան նախագահ Բակո Սահակեանը հոկտեմբերի 28-ին ընդունել է Եւրոպական խորհրդարանի մի խումբ պատգամաւորների: Հանդիպմանը քննարկուել են Արցախի եւ եւրոպական հանրութեան միջեւ կապերի ընդլայնման, ադրբեջանա-ղարաբաղեան հակամարտութեան կարգաւորման, ինչպէս նաեւ տարածաշրջանային գործընթացներին վերաբերող հարցեր:
Բ.Սահակեանն ընդգծել է, որ Արցախի արտաքին քաղաքականութիւնը հիմնուած է հաւասարակշռութեան եւ բազմաուղղվածության սկզբունքների վրայ, եւ այս համատեքստում ԼՂՀ-ը շահագրգռուած է ըստ ամենայնի խորացնել յարաբերութիւնները Եւրոպայի եւ այն ներկայացնող տարբեր կառոյցների հետ:
Երկուստեք նշուվել է Մինսկի խմբի շրջանակներում ադրբեջանա-ղարաբաղեան հակամարտութեան խաղաղ կարգաւորման անհրաժեշտութեան մասին: Հիւրերը բարձր են գնահատել ԼՂՀ-ի յաջողութիւնները ժողովրդավարական պետութիւն կառուցելու ուղղութեամբ` այն համարելով կարեւոր ողջ տարածաշրջանի համար:
Ըստ ԼՂՀ-ի նախագահի աշխատակազմի Տեղեկատուութեան գլխաւոր վարչութեան հաղորդագրութեան, հանդիպմանը մասնակցում էին Արցախի Հանրապետութեան Ազգային ժողովի Նախագահ Աշոտ Ղուլեանը, Եւրոպայի Հայ դատի յանձնախմբի պատասխանատու Հիլդա Չոբոյանը, ՀՀ Ազգային ժողովի պատգամաւորներ Վահան Յովհաննիսեանն ու Արա Բաբլոյեանը:
ԴԱՍ. ՀԱՅԵՐԵՆ 
Հայերեն
Русский
English
French
