ՀԲԸՄ «Երաժշտական Հայաստան» ծրագրի մասնակիցների այցը ՀՀ սփիւռքի նախարարութիւն
24-07-2012 18:55:14 | Հայաստան | Մամլո հաղորդագրություն
Յուլիսի 24-ին ՀՀ սփիւռքի նախարար Հրանոյշ Յակոբեանն ընդունեց «Երաժշտական Հայաստան» ծրագրի մասնակիցներին: Ծրագիրն իրականացւում է Հայկական բարեգործական ընդհանուր միութեան /ՀԲԸՄ/ կողմից Մայր Հայրենիքում սփիւռքահայ երիտասարդութեանը հաղորդակից դարձնելու հայ մշակութային եւ երաժշտական ժառանգութեանը:
Ծրագրի մասնակից սփիւռքահայ երիտասարդ երաժիշտները, հայրենի երաժիշտների ու մասնագէտների ղեկավարութեամբ, հետեւելու են վարպետութեան դասընթացների, ինչպէս նաեւ ունկնդրելու են հայկական երաժշտարուեստի տարբեր ճիւղերի մասին դասախօսութիւններ:
ՀՀ սփիւռքի նախարար Հ.Յակոբեանը, ջերմ ողջունելով սփիւռքահայ երիտասարդներին, մասնաւորապէս նշեց, որ հայ ժողովուրդը դրսում կարողացել է պահպանել իր ինքնութիւնը` նախ եւ առաջ շնորհիւ մշակոյթի: Նա միաժամանակ յորդորեց յաճախակի գալ Հայրենիք եւ մշտապէս սնուել հարազատ ժողովրդի գեղարուեստական ակունքներից: