Սեպտեմբերի 16-ին Հայաստանի Հանրապետութեան եւ Յորդանանի Հաշիմեան Թագաւորութեան արտաքին գործերի նախարարութիւնների միջեւ քաղաքական խորհրդակցութիւններ անցկացնելու նպատակով Յորդանանի մայրաքաղաք Ամման ժամանեց ՀՀ ԱԳ նախարարի տեղակալ Սերգեյ Մանասարեանի գլխաւորած պատուիրակութիւնը: Յորդանանի ԱԳ նախարարութիւնում կայացած հանդիպման ընթացքում կողմերը քննարկեցին երկկողմ յարաբերութիւնների զարգացման հեռանկարներն ու հնարաւորութիւնները, այդ թւում` քաղաքական, տնտեսական, մշակութային, գիտակրթական, հումանիտար եւ այլ հարցեր, ինչպէս նաեւ անդրադարձան տարածաշրջանային խնդիրներին: Երկուստէք կարեւորուեց նման խորհրդակցութիւնների պարբերաբար անցկացումն ու բարձրաստիճան պատուիրակութիւնների փոխայցելութիւնները: Նոյն օրը ԱԳ նախարարի տեղակալի գլխաւորած պատուիրակութիւնը մասնակցեց Ամմանում ՀՀ պատուաւոր հիւպատոսութեան պաշտօնական բացմանը, այնուհետեւ ՀՀ Անկախութեան տարեդարձին նուիրուած ընդունելութիւններին, որոնց ներկայ էին դիւանագէտներ, կառավարութեան եւ խորհրդարանի անդամներ, հասարակական-քաղաքական գործիչներ, ինչպէս նաեւ հայ համայնքի ներկայացուցիչներ: Ինչպէս տեղեկացնում են ՀՀ ԱԳՆ մամուլի, տեղեկատուութեան եւ հասարակայնութեան հետ կապի վարչութիւնից, ՀՀ ԱԳՆ պատուիրակութեան այցի շրջանակներում նախատեսւում են նաեւ հանդիպումներ ՀՀԹ արտաքին գործերի, բարձրագոյն կրթութեան եւ գիտութեան, զբօսաշրջութեան նախարարների, գործարար խորհրդի, Յորդանանի եւ Ամմանի առեւտրա-արդիւնաբերական պալատների անդամների հետ:

---