Միշել Սուլեյման. «Լիբանանը գիտակցում է այն ցավը, որին
հանգեցնում են տեղահանություններն ու ցեղասպանությունները»
13-04-2010 16:26:00 | | Քաղաքական
ԲԵՅՐՈՒԹ, 13 ԱՊՐԻԼԻ, ՆՈՅԵԱՆ ՏԱՊԱՆ: Եռօրյա պաշտօնական այցով
Լիբանանում գտնուող Հայաստանի Ազգային Ժողովի նախագահ Հովիկ
Աբրահամեանը ապրիլի 12-ի առաւօտեան հանդիպում է ունեցել Լիբանանի
արտաքին գործերի եւ էմիգրանտների նախարար Ալի Շամիի հետ:
Լիբանանի արտգործնախարարը նշելով, որ հայերը մեծ դեր են
կատարում Լիբանանի զարգացման գործում, յայտնել է, որ իրենք միշտ էլ
ցանկանում են յարաբերութիւններ զարգացնել քաղաքական, տնտեսական եւ
մշակոյթային ոլորտներում: Եվ այդ գործում մեծ դեր ունեն կատարելու
երկու երկրների դեսպանութիւնները:
Հ.Աբրահամեանն իր հերթին նշել է, որ նման այցերը նպաստում են
երկու երկրների ու ժողովուրդների միջեւ կապերի ամրապնդմանը: Նա
անհրաժեշտ է համարել յարաբերութիւնների ակտիւացումը նաեւ
միջազգային կառոյցներում, առանձնակի կարեւորել է խորհրդարանական
դիւանագիտութեան ակտիւացումը:
Անդրադարձ է կատարուել նաեւ հայ-թուրքական յարաբերութիւններին
եւ ԼՂ հարցին: ՀՀ ԱԺ նախագահը վերստին յայտնել է Հայաստանի
պատրաստակամութիւնը` առանց նախապայմանների յարաբերութիւններ
հաստատել Թուրքիայի հետ: Մինչդեռ վերջինս, ըստ Հ.Աբրահամեանի,
ձգձգում է Ցյուրիխում ստորագրուած արձանագրութիւնների վաւերացումը
խորհրդարանի կողմից: Հ.Աբրահամեանը նշել է, որ ԼՂ-ի
հակամարտութիւնը պէտք է կարգաւորուի խաղաղ ճանապարհով, ԵԱՀԿ Մինսկի
խմբի շրջանակներում: Նա շատ կարեւոր է համարել Լեռնային Ղարաբաղի
ժողովրդի ինքնորոշման իրաւունքի ճանաչումը:
Ալի Շամիի խօսքերով, իրենք համաձայն են, որ հարցը կարգաւորուի
Մինսկի խմբի շրջանակներում:
Այնուհետեւ ՀՀ ԱԺ նախագահը մեկնել է Բաաբդա, որտեղ Լիբանանի
նախագահի նստավայրում նրան ընդունել է Լիբանանի նախագահ, գեներալ
Միշել Սուլեյմանը:
Զրուցակիցներն անդրադարձել են հայ-լիբանանեան երկկողմ
յարաբերութիւններին, տարածաշրջանային խնդիրներին: Անդրադառնալով
հայ-թուրքական արձանագրութիւններին, Հ.Աբրահամեանը անընդունելի ու
դատապարտելի է համարել, որ Թուրքիան դրանց վաւերացումը կապում է ԼՂ
խնդրի հետ: ՀՀ ԱԺ նախագահի խօսքերով, Հայաստանը ցանկանում է
հարեւանների հետ ունենալ բարեկամական յարաբերութիւններ, բայց
դրանք չեն կարող լինել հայ ժողովրդի արժանապատվության հաշուին:
Լիբանանի նախագահը ցանկալի է համարել հարեւանների հետ
փոխհարաբերությունների կարգաւորումը դիւանագիտական ճանապարհով: Նրա
խօսքերով, Լիբանանը գիտակցում է այն ցավը, որին հանգեցնում են
տեղահանություններն ու ցեղասպանությունները: Նա անընդունելի է
համարել փոքր պետութիւնների կամ ազգերի իրաւունքները խախտելը:
Մ.Սուլեյմանը կարեւորել է Հայաստանի ու Լիբանանի
համագործակցութիւնը միջազգային կառոյցներում` ի նպաստ Մերձաւոր
Արեւելքում խաղաղութեան եւ հայկական հարցի լուծման:
Հ.Աբրահամեանը նշել է, որ պէտք է պաշտպանուի իւրաքանչիւր
ժողովրդի ինքնորոշման իրաւունքը: Նա յայտարարել է, որ ԼՂ-ի
հակամարտութեան կարգաւորման գործընթացում ամենակարեւորը Լեռնային
Ղարաբաղի ինքնորոշման իրաւունքն է, ԼՂ-ի ժողովրդի անվտանգութիւնը
եւ ԼՂ-ի կարգավիճակի հարցը` Լեռնային Ղարաբաղը երբեք չի կարող
լինել Ադրբեջանի կազմում: Մնացած հարցերում, ըստ նրա, Հայաստանը
կարող է գնալ փոխզիջումների:
ՀՀ ԱԺ նախագահը եւ Լիբանանի նախագահը կարեւորել են նաեւ երկու
երկրների կառավարությունների միջեւ կապերի ակտիւացումը:
Մասնաւորապէս, նշուվել են առեւտրի եւ զբօսաշրջութեան ոլորտները:
Հայ-լիբանանեան տնտեսական յարաբերութիւնները աւելի
հանգամանալից քննարկուել են Հ.Աբրահամեանի եւ Լիբանանի վարչապետ
Սաադ Հարիրիի հանդիպման ժամանակ:
Հ.Աբրահամեանը անհրաժեշտ է համարել տնտեսական կապերի
ընդլայնումը, նշելով, որ որպէս խորհրդարանի նախագահ ամէն ինչ կանի
դրանց զարգացման համար: Նա առաջարկել է Լիբանանի վարչապետի այս
տարուայ սեպտեմբերին Հայաստան այցի շրջանակներում անցկացնել
հայ-լիբանանեան բիզնես-ֆորում:
Հանդիպմանը քննարկուել է նաեւ հայ-թուրքական
յարաբերութիւնների հարցը: Սաադ Հարիրին նշել է, որ դրանց
բարելաւման ուղղութեամբ Հայաստանի կողմից կատարւող քայլերն ուղղուած
են տարածաշրջանում անվտանգութիւն եւ կայունութիւն ապահովելուն:
Նոյն օրը Հ.Աբրահամեանն այցելել է Լիբանանի նախկին վարչապետ,
նահատակ Ռաֆիկ Հարիրիի շիրիմին եւ ծաղկեպսակ դրել:
Այնուհետեւ ՀՀ ԱԺ նախագահի գլխաւորած պատուիրակութիւնը մեկնել
է պատմական Բաալբեկ, որտեղ նրան դիմաւորել է քաղաքապետը, ում հետ
ՀՀ ԱԺ նախագահը կարճատեւ հանդիպում է ունեցել:
Ապրիլի 12-ի երեկոյեան Հովիկ Աբրահամեանի գլխաւորած
պատուիրակութիւնն այցելել է հայաբնակ Այնջար բնակավայր: Նա
ծաղկեպսակ է դրել մուսալեռցիների յիշատակին կանգնեցուած
յուշարձանին, ապա հանդիպում ունեցել հայրենակիցների հետ: