Միշել Սուլեյման. «Լիբանանը գիտակցում է այն ցավը, որին
հանգեցնում են տեղահանություններն ու ցեղասպանությունները»
13-04-2010 16:26:00 | Լիբանան | Քաղաքական
ԲԵՅՐՈՒԹ, 13 ԱՊՐԻԼԻ, ՆՈՅՅԱՆ ՏԱՊԱՆ: Եռօրյա պաշտոնական այցով
Լիբանանում գտնվող Հայաստանի Ազգային Ժողովի նախագահ Հովիկ
Աբրահամյանը ապրիլի 12-ի առավոտյան հանդիպում է ունեցել Լիբանանի
արտաքին գործերի եւ էմիգրանտների նախարար Ալի Շամիի հետ:
Լիբանանի արտգործնախարարը նշելով, որ հայերը մեծ դեր են
կատարում Լիբանանի զարգացման գործում, հայտնել է, որ իրենք միշտ էլ
ցանկանում են հարաբերություններ զարգացնել քաղաքական, տնտեսական եւ
մշակութային ոլորտներում: Եվ այդ գործում մեծ դեր ունեն կատարելու
երկու երկրների դեսպանությունները:
Հ.Աբրահամյանն իր հերթին նշել է, որ նման այցերը նպաստում են
երկու երկրների ու ժողովուրդների միջեւ կապերի ամրապնդմանը: Նա
անհրաժեշտ է համարել հարաբերությունների ակտիվացումը նաեւ
միջազգային կառույցներում, առանձնակի կարեւորել է խորհրդարանական
դիվանագիտության ակտիվացումը:
Անդրադարձ է կատարվել նաեւ հայ-թուրքական հարաբերություններին
եւ ԼՂ հարցին: ՀՀ ԱԺ նախագահը վերստին հայտնել է Հայաստանի
պատրաստակամությունը` առանց նախապայմանների հարաբերություններ
հաստատել Թուրքիայի հետ: Մինչդեռ վերջինս, ըստ Հ.Աբրահամյանի,
ձգձգում է Ցյուրիխում ստորագրված արձանագրությունների վավերացումը
խորհրդարանի կողմից: Հ.Աբրահամյանը նշել է, որ ԼՂ-ի
հակամարտությունը պետք է կարգավորվի խաղաղ ճանապարհով, ԵԱՀԿ Մինսկի
խմբի շրջանակներում: Նա շատ կարեւոր է համարել Լեռնային Ղարաբաղի
ժողովրդի ինքնորոշման իրավունքի ճանաչումը:
Ալի Շամիի խոսքերով, իրենք համաձայն են, որ հարցը կարգավորվի
Մինսկի խմբի շրջանակներում:
Այնուհետեւ ՀՀ ԱԺ նախագահը մեկնել է Բաաբդա, որտեղ Լիբանանի
նախագահի նստավայրում նրան ընդունել է Լիբանանի նախագահ, գեներալ
Միշել Սուլեյմանը:
Զրուցակիցներն անդրադարձել են հայ-լիբանանյան երկկողմ
հարաբերություններին, տարածաշրջանային խնդիրներին: Անդրադառնալով
հայ-թուրքական արձանագրություններին, Հ.Աբրահամյանը անընդունելի ու
դատապարտելի է համարել, որ Թուրքիան դրանց վավերացումը կապում է ԼՂ
խնդրի հետ: ՀՀ ԱԺ նախագահի խոսքերով, Հայաստանը ցանկանում է
հարեւանների հետ ունենալ բարեկամական հարաբերություններ, բայց
դրանք չեն կարող լինել հայ ժողովրդի արժանապատվության հաշվին:
Լիբանանի նախագահը ցանկալի է համարել հարեւանների հետ
փոխհարաբերությունների կարգավորումը դիվանագիտական ճանապարհով: Նրա
խոսքերով, Լիբանանը գիտակցում է այն ցավը, որին հանգեցնում են
տեղահանություններն ու ցեղասպանությունները: Նա անընդունելի է
համարել փոքր պետությունների կամ ազգերի իրավունքները խախտելը:
Մ.Սուլեյմանը կարեւորել է Հայաստանի ու Լիբանանի
համագործակցությունը միջազգային կառույցներում` ի նպաստ Մերձավոր
Արեւելքում խաղաղության եւ հայկական հարցի լուծման:
Հ.Աբրահամյանը նշել է, որ պետք է պաշտպանվի յուրաքանչյուր
ժողովրդի ինքնորոշման իրավունքը: Նա հայտարարել է, որ ԼՂ-ի
հակամարտության կարգավորման գործընթացում ամենակարեւորը Լեռնային
Ղարաբաղի ինքնորոշման իրավունքն է, ԼՂ-ի ժողովրդի անվտանգությունը
եւ ԼՂ-ի կարգավիճակի հարցը` Լեռնային Ղարաբաղը երբեք չի կարող
լինել Ադրբեջանի կազմում: Մնացած հարցերում, ըստ նրա, Հայաստանը
կարող է գնալ փոխզիջումների:
ՀՀ ԱԺ նախագահը եւ Լիբանանի նախագահը կարեւորել են նաեւ երկու
երկրների կառավարությունների միջեւ կապերի ակտիվացումը:
Մասնավորապես, նշվել են առեւտրի եւ զբոսաշրջության ոլորտները:
Հայ-լիբանանյան տնտեսական հարաբերությունները ավելի
հանգամանալից քննարկվել են Հ.Աբրահամյանի եւ Լիբանանի վարչապետ
Սաադ Հարիրիի հանդիպման ժամանակ:
Հ.Աբրահամյանը անհրաժեշտ է համարել տնտեսական կապերի
ընդլայնումը, նշելով, որ որպես խորհրդարանի նախագահ ամեն ինչ կանի
դրանց զարգացման համար: Նա առաջարկել է Լիբանանի վարչապետի այս
տարվա սեպտեմբերին Հայաստան այցի շրջանակներում անցկացնել
հայ-լիբանանյան բիզնես-ֆորում:
Հանդիպմանը քննարկվել է նաեւ հայ-թուրքական
հարաբերությունների հարցը: Սաադ Հարիրին նշել է, որ դրանց
բարելավման ուղղությամբ Հայաստանի կողմից կատարվող քայլերն ուղղված
են տարածաշրջանում անվտանգություն եւ կայունություն ապահովելուն:
Նույն օրը Հ.Աբրահամյանն այցելել է Լիբանանի նախկին վարչապետ,
նահատակ Ռաֆիկ Հարիրիի շիրիմին եւ ծաղկեպսակ դրել:
Այնուհետեւ ՀՀ ԱԺ նախագահի գլխավորած պատվիրակությունը մեկնել
է պատմական Բաալբեկ, որտեղ նրան դիմավորել է քաղաքապետը, ում հետ
ՀՀ ԱԺ նախագահը կարճատեւ հանդիպում է ունեցել:
Ապրիլի 12-ի երեկոյան Հովիկ Աբրահամյանի գլխավորած
պատվիրակությունն այցելել է հայաբնակ Այնջար բնակավայր: Նա
ծաղկեպսակ է դրել մուսալեռցիների հիշատակին կանգնեցված
հուշարձանին, ապա հանդիպում ունեցել հայրենակիցների հետ: