Սերժ Սարգսեան. «Հայոց բանակի կազմաւորումն ու կայացումը
պատմական նուաճում էր»
28-01-2010 16:20:00 | Հայաստան | Քաղաքական
ԵՐԵՎԱՆ, 28 ՅՈՒՆՎԱՐԻ, ՆՈՅԵԱՆ ՏԱՊԱՆ: Հայոց բանակի կազմաւորման
18-րդ տարեդարձի առթիւ յունվարի 28-ին ՀՀ նախագահ Սերժ Սարգսեանը
պետական պարգեւներ յանձնեց մի խումբ զինծառայողների:
Զօրքերի մարտական պատրաստուածութեան ապահովման գործում ներդրած
նշանակալի աւանդի, ինչպէս նաեւ հայրենիքի սահմանները պաշտպանելիս
ցուցաբերած խիզախութեան ու անձնուիրութեան ՀՀ նախագահի յունվարի
25-ի հրամանագրով պաշտպանութեան նախարարութեան մի խումբ
զինծառայողներ եւ ազատամարտիկներ պարգեւատրուել են ՀՀ մեդալներով:
Նախագահի մէկ այլ հրամանագրով ՀՀ նախագահի գլխաւոր ռազմական տեսչի
առաջին տեղակալ, գեներալ-մայոր Լեոնիդ Մարտիրոսովին շնորհուել է
գեներալ-լեյտենանտի, իսկ ՀՀ զինուած ուժերի գլխաւոր շտաբի օպերատիւ
վարչութեան պետ, գնդապետ Արտակ Դաւթեանին` գեներալ-մայորի
զինուորական կոչում:
Շնորհաւորելով պարգեւատրվածներին Հայկական բանակի օրուայ եւ
Հայաստանի Հանրապետութեան կառավարական պարգեւների ու բարձրագոյն
զինուորական կոչումների արժանանալու կապակցութեամբ, Ս.Սարգսեանն
ասել է.
«Այս պարգեւներով մեր երկիրն ու ժողովուրդը իր գնահատականն ու
վերաբերմունքն է արտայայտում այն մարդկանց հանդէպ, ովքեր
անձնուիրաբար ծառայում են Հայաստանի Հանրապետութեանը, ովքեր կամաւոր
իրենց կեանքը դարձրել են առաքելութիւն` ուղղուած պաշտպանութեան ու
խաղաղութեան պահպանման նուիրական գործին»: Նա նշել է, որ Հայոց
բանակի կազմաւորումն ու կայացումը պատմական նուաճում էր: Նրա
խօսքերով, «պետականութեան կորստի, ուրեմն եւ բանակի բացակայութեան
պատճառով մենք թանկ, շատ թանկ գին ենք վճարել` սկսած միջնադարից
մինչեւ 1915 թուական, մինչեւ Սումգայիթ. Կիրովաբադ ու Բաքու»:
Ս.Սարգսեյանի խօսքերով, պատերազմի բերած արեան ու արցունքների,
կրակների մէջ ծնուած հայկական բանակը այսօր այն երկաթէ երաշխիքն է,
որ ապահովում է մեր գոյութիւնն ու ընթացքը եւ սառը ցնցուղ է
ցանկացած տաքագլուխ արկածախնդրութեան դէմ: Նրա բնորոշմամբ, Հայոց
բանակը հայ ազգի արժանապատվությունն է: «Այդ արժանապատվությունն
էր, որ ոտքի հանեց մեր ժողովրդի բոլոր հատվածներին եւ
մասնաւորապէս, այն կամաւորներին, որ պիտի հիմքն ու խարիսխը
դառնային ապագայ կանոնաւոր բանակի: Նրանցից շատերը իրենց երիտասարդ
կեանքը դրեցին Հայրենիքի եւ Ազատութեան զոհասեղանին, հաւերժ փառք
նրանց, խոնարհում ու խնկարկում նրանց պայծառ յիշատակին»,- ասաց նա:
Դիմելով հանդիսութեանը ներկայ բարձրաստիճան սպաներին, ՀՀ
նախագահը, ով ի պաշտօնէ նաեւ Գերագոյն գլխաւոր հրամանատարն է,
ասաց. «Ձեր գերխնդիրն է ապահովել Հայրենիքի անվտանգութիւնը: Ձեր
մասնագիտական բարձր որակներով, արդի տեխնիկական միջոցներին
կատարելապէս տիրապետելու հմտութեամբ, բարոյակամային յատկանիշներով
ու հայրենասիրական խրոխտ կեցուածքով դուք յուսալիօրէն կանգնած եք
ցանկացած ոտնձգութեան դէմ, եւ որեւէ սադրանքի հեղինակ հաստատապէս
պէտք է լուրջ հակահարվածներ, նաեւ մեծ անակնկալներ սպասի հայկական
բանակից: Չհասկանալ սա` առնուազն միամտութիւն է: Մարդկանց, ազգերի,
պետութիւնների իրաւունքները յարգող իւրաքանչիւր նորմալ երկրի
համար ամենամեծ յաղթանակը պատերազմը կանխելն է: Դուք դա անում եք
լիարժեքորեն, պատվախնդիր կերպով եւ վայելում եք մեր ժողովրդի սէրը,
հանգանքը, վստահութիւնը»:
Առանց մարտունակ զինուած ուժերի, ըստ Ս.Սարգսեանն, այսօր
տարածաշրջանում չի կարող լինել հաւասարակշռութիւն, ուրեմն եւ`
խաղաղութիւն ու կայունութիւն: «Մեր բանակի դերն այսօր չի
սահմանափակւում միայն երկրի սահմանների պաշտպանութեամբ: Միջազգային
խորացող ինտեգրացիան ենթադրում է նոր խնդիրներ տարբեր
ուղղութիւններով, որոնք լուծւում են հաջողութեամբ»,- ասաց նա: