Հայաստանի ԳԱԱ-ում տեղի է ունեցել Միջազգային աստղագիտական
տարուայ փակման հանդիսաւոր արարողութիւնը
28-12-2009 16:06:00 | Հայաստան | Հասարակութիւն
ԵՐԵՎԱՆ, 28 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի ԳԱԱ-ում
դեկտեմբերի 28-ին տեղի է ունեցել եունեսկօ-ի կողմից յայտարարուած
Միջազգային աստղագիտական տարուայ (ՄԱՏ-2009, IYA-2009) փակման
հանդիսաւոր արարողութիւնը: Միջոցառմանն ամփոփուել են աստղագիտական
տարուայ ընթացքում աշխարհում եւ Հայաստանում անցկացուած
միջոցառումների արդիւնքները:
Հայաստանը աստղագիտական տարին նշել է մի շարք
միջոցառումներով, որտեղ գլխաւոր տեղը զբաղեցրել է աշխարհահռչակ
աստղաֆիզիկոս Վիկտոր Համբարձումեանի 100-ամեակին նուիրուած
տոնակատարությունը: Գիտնականի ծննդեան օրը` սեպտեմբերի 18-ը,
Հայաստանում յայտարարուել էր աստղագիտութեան օր: ՀՀ նախագահի կողմից
սահմանուել էր Վ.Համբարձումեանի միջազգային մրցանակ, իսկ Երեւանում
բացուել աստղաֆիզիկոսի յուշարձանը:
Բիւրականում տեղի են ունեցել Բիւրականեան երկրորդ ամառային
դպրոցը ԵՊՀ ուսանողների համար, «Աստղագիտութիւնը եւ
հասարակութիւնը» թեմայով Հայկական աստղագիտական ընկերութեան (ՀԱԸ)
տարեկան համաժողովը, Հայ-ֆրանսիական աստղագիտական
խորհրդակցութիւնը, «Համակարգչային գիտութիւն եւ տեղեկատուական
տեխնոլոգիաներ» (CSIT-2009) գիտաժողովի նստաշրջանը, դպրոցականների
հանրապետական աստղագիտական օլիմպիադայի եզրափակիչ փուլը, հայ
մեծանուն աստղագետների հոբելեաններին նուիրուած սեմինարներ:
Անցկացուել է «Ես եւ Տիեզերքը» թեմայով պատանի նկարիչների
ցուցահանդէս-մրցոյթը, իսկ ԵՊՀ-ում եւ Երեւանի մի շարք
դպրոցներում` գիտահանրամատչելի դասախօսութիւններ:
Լիովին նորացվել եւ հարստացվել է Հայկական աստղագիտական
ընկերութեան ինտերնետային կայքէջը (www.aras.am), որտեղ այժմ
լիարժէք տեղեկութիւններ են տեղադրուած հայկական աստղագիտութեան
վերաբերեալ:
Ըստ ՀՀ ԳԱԱ-ի Տեղեկատուական-վերլուծական կենտրոնի
հաղորդագրութեան, աստղագիտությանը ցուցաբերած աջակցութեան համար
պատւոգրերի են արժանացել «Վիվասել», «Ապաւէն», «Անտարես», «Էդիտ
Պրինտ», «Արայ» ընկերութիւնները, աստղագիտութեան լուսաբանման
համար` «Արմէնպրես» տեղեկատուական գործակալութիւնը, «Արմէնպրես»-ի
լրագրող Լուսինէ Մարտիրոսեանը, «Առաւօտ» օրաթերթի լրագրող Մելանյա
Բարսեղեանը, աստղագիտական կրթութեան մէջ դերի համար` Մարիետա
Գյուլզադյանը:
Գիտութեան մէջ ունեցած երկարամեայ վաստակի համար ՀՀ ԳԱԱ
վաստակագրեր են յանձնուել Արթուր Նիկողոսեանին, Արմէն
Գյուլբուդաղյանին, Նորայր Մելիքյանին, Արտաշէս Պետրոսեանին, Տիգրան
Մաղաքյանին եւ Հայկ Յարութիւնյանին:
Գիտութեան մէջ ցուցաբերած յաջողութիւնների համար ՀՀ ԳԱԱ
պատվոգրեր են ստացել Տիգրան Մովսիսեանը, Աշոտ Յակոբեանը, Կամո
Գիգոյանը, Ելենա Նիկողոսեանը, Սմբատ Բալայեանը եւ Արեգ Միքայելեանը:
Աստղագիտութեան մէջ ունեցած վաստակի համար Բիւրականի
աստղադիտարանի եւ Հայկական աստղագիտական ընկերութեան կողմից
Լյուդվիկ Միրզոեանի անուան մրցանակ է շնորհուել Էլմա Պարսամեանին:
Յայտնի աստղագէտ Փիշմիշի անուան մրցանակը շնորհուել է Ելենա
Նիկողոսեանին` որպէս լաւագոյն կին աստղագետի, իսկ Լուսինէ
Սարգսեանը պարգեւատրուել է Հայկական աստղագիտական ընկերութեան
Երուանդ Թերզյանի անուան երիտասարդ աստղագետների տարեկան մրցանակով:
Մրցանակներով պարգեւատրուել են նաեւ միջազգային աստղագիտական
օլիմպիադայում յաղթող դպրոցականները` Հայկ Յակոբեանը եւ Հայկ
Թեփանյանը:
Միջազգային աստղագիտական տարուայ հանդիսաւոր փակումը տեղի
կունենայ 2010թ. յունվարի 9-10-ին Իտալիայի Պադուա քաղաքում
անցկացուելիք գիտաժողովի ընթացքում: