Հայաստանի ԳԱԱ-ում տեղի է ունեցել Միջազգային աստղագիտական
տարվա փակման հանդիսավոր արարողությունը
28-12-2009 16:06:00 | Հայաստան | Հասարակություն
ԵՐԵՎԱՆ, 28 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի ԳԱԱ-ում
դեկտեմբերի 28-ին տեղի է ունեցել ՅՈւՆԵՍԿՕ-ի կողմից հայտարարված
Միջազգային աստղագիտական տարվա (ՄԱՏ-2009, IYA-2009) փակման
հանդիսավոր արարողությունը: Միջոցառմանն ամփոփվել են աստղագիտական
տարվա ընթացքում աշխարհում եւ Հայաստանում անցկացված
միջոցառումների արդյունքները:
Հայաստանը աստղագիտական տարին նշել է մի շարք
միջոցառումներով, որտեղ գլխավոր տեղը զբաղեցրել է աշխարհահռչակ
աստղաֆիզիկոս Վիկտոր Համբարձումյանի 100-ամյակին նվիրված
տոնակատարությունը: Գիտնականի ծննդյան օրը` սեպտեմբերի 18-ը,
Հայաստանում հայտարարվել էր աստղագիտության օր: ՀՀ նախագահի կողմից
սահմանվել էր Վ.Համբարձումյանի միջազգային մրցանակ, իսկ Երեւանում
բացվել աստղաֆիզիկոսի հուշարձանը:
Բյուրականում տեղի են ունեցել Բյուրականյան երկրորդ ամառային
դպրոցը ԵՊՀ ուսանողների համար, «Աստղագիտությունը եւ
հասարակությունը» թեմայով Հայկական աստղագիտական ընկերության (ՀԱԸ)
տարեկան համաժողովը, Հայ-ֆրանսիական աստղագիտական
խորհրդակցությունը, «Համակարգչային գիտություն եւ տեղեկատվական
տեխնոլոգիաներ» (CSIT-2009) գիտաժողովի նստաշրջանը, դպրոցականների
հանրապետական աստղագիտական օլիմպիադայի եզրափակիչ փուլը, հայ
մեծանուն աստղագետների հոբելյաններին նվիրված սեմինարներ:
Անցկացվել է «Ես եւ Տիեզերքը» թեմայով պատանի նկարիչների
ցուցահանդես-մրցույթը, իսկ ԵՊՀ-ում եւ Երեւանի մի շարք
դպրոցներում` գիտահանրամատչելի դասախոսություններ:
Լիովին նորացվել եւ հարստացվել է Հայկական աստղագիտական
ընկերության ինտերնետային կայքէջը (www.aras.am), որտեղ այժմ
լիարժեք տեղեկություններ են տեղադրված հայկական աստղագիտության
վերաբերյալ:
Ըստ ՀՀ ԳԱԱ-ի Տեղեկատվական-վերլուծական կենտրոնի
հաղորդագրության, աստղագիտությանը ցուցաբերած աջակցության համար
պատվոգրերի են արժանացել «Վիվասել», «Ապավեն», «Անտարես», «Էդիտ
Պրինտ», «Արայ» ընկերությունները, աստղագիտության լուսաբանման
համար` «Արմենպրես» տեղեկատվական գործակալությունը, «Արմենպրես»-ի
լրագրող Լուսինե Մարտիրոսյանը, «Առավոտ» օրաթերթի լրագրող Մելանյա
Բարսեղյանը, աստղագիտական կրթության մեջ դերի համար` Մարիետա
Գյուլզադյանը:
Գիտության մեջ ունեցած երկարամյա վաստակի համար ՀՀ ԳԱԱ
վաստակագրեր են հանձնվել Արթուր Նիկողոսյանին, Արմեն
Գյուլբուդաղյանին, Նորայր Մելիքյանին, Արտաշես Պետրոսյանին, Տիգրան
Մաղաքյանին եւ Հայկ Հարությունյանին:
Գիտության մեջ ցուցաբերած հաջողությունների համար ՀՀ ԳԱԱ
պատվոգրեր են ստացել Տիգրան Մովսիսյանը, Աշոտ Հակոբյանը, Կամո
Գիգոյանը, Ելենա Նիկողոսյանը, Սմբատ Բալայանը եւ Արեգ Միքայելյանը:
Աստղագիտության մեջ ունեցած վաստակի համար Բյուրականի
աստղադիտարանի եւ Հայկական աստղագիտական ընկերության կողմից
Լյուդվիկ Միրզոյանի անվան մրցանակ է շնորհվել Էլմա Պարսամյանին:
Հայտնի աստղագետ Փիշմիշի անվան մրցանակը շնորհվել է Ելենա
Նիկողոսյանին` որպես լավագույն կին աստղագետի, իսկ Լուսինե
Սարգսյանը պարգեւատրվել է Հայկական աստղագիտական ընկերության
Երվանդ Թերզյանի անվան երիտասարդ աստղագետների տարեկան մրցանակով:
Մրցանակներով պարգեւատրվել են նաեւ միջազգային աստղագիտական
օլիմպիադայում հաղթող դպրոցականները` Հայկ Հակոբյանը եւ Հայկ
Թեփանյանը:
Միջազգային աստղագիտական տարվա հանդիսավոր փակումը տեղի
կունենա 2010թ. հունվարի 9-10-ին Իտալիայի Պադուա քաղաքում
անցկացվելիք գիտաժողովի ընթացքում: