Հայաստանն ընդունել է Ադրբեջանի տարածքային ամբողջականութեան
սկզբունքը,- ասում է ՀԱԿ-ի համակարգողը
04-12-2009 14:46:00 | Հայաստան | Քաղաքական
ԵՐԵՎԱՆ, 4 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Արտգործնախարարների
աթէնքեան հանդիպմանը կատարուել է մի ահաւոր բան` Հայաստանն ընդունել
է, որ ղարաբաղեան հակամարտութիւնը պէտք է կարգաւորուի Ադրբեջանի
տարածքային ամբողջականութեան սկզբունքի հիման վրայ: Յայտարարելով
այս մասին դեկտեմբերի 4-ի ասուլիսում, Հայ Ազգային կոնգրեսի
համակարգող Լեւոն Զուրաբյանը նշեց, որ ամենակարեւորը Արցախի
ժողովրդի ինքնորոշումն է, եւ այն բարձրաձայնելու համար անկախ
Հայաստանի առաջին իշխանութիւնները հարցը մտցրել էին ԵԱՀԿ, որտեղ
Հայաստանը վետոյի իրաւունք ուներ: Լ.Զուրաբյանը յիշեցրեց, որ
Աթէնքում ընդունուած յայտարարութեյան բովանդակութեամբ բազմաթիւ
առաջարկներ եղել են նաեւ առաջին նախագահի օրոք, սակայն նախագահն
օգտուել է վետոյի իրաւունքից:
Իսկ այսօր, ըստ Լ.Զուրաբյանի, Հայաստանի իշխանութիւնները
մատնանշում են, որ ստորագրուած փաստաթղթում առկայ է նաեւ ազգերի
ինքնորոշման սկզբունքը` մոռանալով, որ Ադրբեջանը միշտ պատրաստ է
եղել խնդիրը լուծել այդ սկզբունքով, սակայն` տարածքային
ամբողջականութեան շրջանակներում, ինչը նշանակում է Ղարաբաղի բարձր
ինքնավարութիւն Ադրբեջանի կազմում:
Պատասխանելով լրագրողների այն դիտարկմանը, թէ Ադրբեջանի
կազմում Արցախի ինքնավարութեան մասին Լ.Տեր-Պետրոսեանը ասել է
դեռեւս 1994թ.-ին «Կոմսոմոլսկայա պրաւդա» թերթին տուած
հարցազրոյցում, Լ.Զուրաբյանը նշեց, որ այն ժամանակ նախագահի բոլոր
յայտարարութիւններն ուղղուած են եղել ռազմական անվտանգութեան
ապահովմանը: Նրա խօսքերով, նման յայտարարութիւններով նախկին
իշխանութիւնները ապահովել են յաղթանակը, իսկ ներկայ
իշխանութիւնները ամպագոռգոռ արտայայտութիւններով գնում են դէպի
պարտութիւն:
Լ.Զուրաբյանը հրաժարուեց մեկնաբանել Հանրապետական
կուսակցութեան վերջին համագումարում նախագահ Սերժ Սարգսեյանի
ելոյթը, նշելով, որ ընդդիմությանը հետաքրքրում է իշխանութեան ոչ
թէ խօսքը, այլ գործը: «Եթէ նրանք չեն արձակում 15
քաղբանտարկյալներին, համերաշխութեան մասին նրանց ասածները գրոշի
արժէք չունեն»,- նկատեց նա: