Ազգային անվտանգութեան խորհրդի քարտուղար Արթուր Բաղդասարեանն ապրիլի 29-ին ընդունել է Եւրոմիութեան ընդլայնման եւ եւրոպական հարեւանութեան քաղաքականութեան հարցերով յանձնակատար Շտեֆան Ֆիւլէի գլխաւորած պատուիրակութեանը: Հանդիպմանը ներկայ էր նաեւ Հայաստանում Եւրոմիութեան Պատուիրակութեան ղեկավար, դեսպան Ռաուլ դէ Լիւցեմբերգերը: Զրուցակիցները քննարկել են Հայաստան-եմ համագործակցութեան առկայ վիճակը եւ յետագայ զարգացման հեռանկարները: Երկուստէք դրական է գնահատուել համագործակցութեան բարձր մակարդակը եւ յարաբերութիւնների արագ զարգացումը: Արթուր Բաղդասարեանը անդրադարձել է Հայաստան-եմ համագործակցութեան շրջանակներում իրականացուող ծրագրերի ընթացքին, առանձնացնելով մարդու իրաւունքների, ժողովրդավարութեան եւ ոստիկանական համակարգի բարեփոխումները, ազատութեան, արդարադատութեան եւ անվտանգութեան ոլորտում իրականացուող աշխատանքները: ԱԱԽ քարտուղարը անդրադարձ է կատարել նաեւ Արեւելեան Ներդրումներ ծրագրին, ընդգծելով դրա կարեւորութիւնը Հայաստանի տնտեսական բարեփոխումների ճանապարհին եւ յետագայ առաւել սերտ փոխգործակցութեան հնարաւորութիւնները: Արթուր Բաղդասարեանը իր գոհունակութիւնն է յայտնել Հայաստան-եմ քաղաքական համագործակցութեան` ասոցացման համաձայնագրերի շուրջ բանակցութիւնների ընթացքի վերաբերեալ` շեշտելով համագործակցութեան հրապարակայնութեան կարեւորութիւնը: Ընդգծուել է Հայաստանում Եւրոմիութեան տեղեկատուական կենտրոնների հիմնման կարեւորութիւնը: Շտեֆան Ֆիւլեն բարձր է գնահատել Աախ-ի շրջանակներում գործող, եւրոպական կառոյցների գործունէութիւնը համակարգող միջգերատեսչական յանձնաժողովի գործունէութիւնը եւրոինտէգրման ճանապարհին Հայաստանում կենսագործուող բարեփոխումների համատեքստում, նշելով, որ քաղաքական համակարգումը կարեւոր հանգամանք է Եւրոպական հարեւանութեան քաղաքականութեան ծրագրի իրականացման գործընթացում: Նա իր պատրաստակամութիւնն է յայտնել աջակցել վերը նշուած ոլորտներում իրականացուող բարեփոխումների ընթացքին, քանի որ դրանք մի շարք ուղղութիւններով լիովին համահունչ են Եւրոպական հարեւանութեան քաղաքականութեան փիլիսոփայութեանը:

---