Ապրիլի 27-ին ՀՀ Ազգային ժողովում «Ժառանգութիւն» խմբակցութեան պատգամաւորներ Անահիտ Բախշեանը, Զարուհի Փոստանջեանը եւ Ստեօպայ Սաֆարեանը հանդիպեցին Եւրոպական խորհրդարանում Եւրոպական ժողովրդական կուսակցութեան խմբի նախագահի տեղակալ Խայիմ Մայոր Օրեխայի հետ: Հանդիպման ընթացքում Անահիտ Բախշեանը կարեւորեց Եւրոպական ժողովրդական կուսակցութեանը «Ժառանգութիւն» կուսակցութեան անդամակցումը, որն իր ներքին ժողովրդավարական չափանիշներով, խօսքի եւ գործի մէկտեղմամբ համապատասխանում է ժողովրդավարական կուսակցութեան չափանիշներին: Ա.Բախշեանը նաեւ վկայակոչեց նախորդ օրը Հանրապետական կուսակցութեան հետ «Արժէքների դերը անցումային հասարակութիւններում» սեմինարի ժամանակ վարչապետի հիմնաւոր ինքնախոստովանութիւնը, որն այսօրուայ իրականութիւնն է արտացոլում ու փաստացի վկայում է իշխանութեան անզօրութեան եւ եւրոպական առաջադէմ արժէքների բացակայութեան մասին: Իր խօսքում Զարուհի Փոստանջեանը նշեց, որ «Հաւաքների ազատութեան» մասին օրէնքը եւ առաջին ընթերցմամբ ընդունուած «Ընտրական օրէնսգիրքը» ՀՀ Ազգային ժողովի կողմից ընդունուել են առանց կ'ոնսենսուսի: Փոստանջեանը նաեւ ընդգծեց, որ միջազգային կառոյցների կողմից հնչող՝ «մէկ քայլ առաջ» ձեւակերպումներն այլեւս չեն բաւարարում Հայաստանի մեր ժողովրդին, եւ այսպէս շարունակուելու դէպքում 2012 եւ 2013թթ. ընտրութիւնների ժամանակ կարող են անխուսափելի լինել աւելի վատ հետեւանքներով բախումներն ու առճակատումները: Ստեօպայ Սաֆարեանը նշեց, որ «Ժառանգութիւն» ազգային-ազատական կուսակցութիւնը, հաւատարիմ մնալով իր ծրագրին եւ գաղափարախօսութեանը, միեւնոյն ժամանակ ձգտում է դէպի եւրոպական լաւագոյն արժէքների կենսակոչմանը Հայաստանում: Սաֆարեանն ընդգծեց կուսակցութեան պատասխանատուութեան զգացումը քաղաքական գործընթացներում, ինչպէս նաեւ հիմնաւորեց, թէ ինչու է «Ժառանգութիւնը» բարձր չափանիշներ եւ նշաձող սահմանել թէ իր եւ թէ հայաստանեան կուսակցութիւնների համար, ու պահանջում է, որ իշխանութիւններից մինչեւ ընդդիմութիւն եւ եւրոպական կ'առոյցնէր նոյնպիսի չափանիշներով գնահատեն հայաստանեան իրողութիւնները: Ըստ «Ժառանգութեան» մամլոյ ծառայութիւնից «ՆՏ»-ին տրամադրած հաղորդագրութեան, Մայոր Օրեխան, ծաւալուած քննարկումների ընթացքում ուշադիր լսելով «Ժառանգութեան» պատգամաւորների մօտեցումները, ներկայացրեց նաեւ իր դիտարկումները քննարկուած հարցերի եւ հնարաւոր լուծումների ուղղութեամբ, այդ թւում՝ Եւրոպական Ժողովրդական կուսակցութեանը «Ժառանգութիւն» կուսակցութեան անդամակցութեան վերաբերեալ: Նա նշեց նաեւ, որ Հայաստանում բարեփոխումները պէտք է արժանանան լայն հասարակայնութեան աջակցութեանը եւ բարեփոխեն իրականութիւնը, այլ ոչ թէ հանդիսանան նահանջ կամ նմանակեղծում` իմիտացիայ: Օրեխան նաեւ վկայակոչեց Իսպանիայի փորձը` մատնանշելով իր եւ իր քաղաքական ուժի դերակատարումը Իսպանիայի քաղաքական համակարգը ժողովրդավարացնելու եւ Իսպանիան Միացեալ Եւրոպայի լիարժէք մաս դարձնելու ուղղութեամբ:

---