Իշխանութիւնները համաձայնելու են գնալ արտահերթ նախագահական
ընտրութիւնների,- համոզուած է Վահագն Խաչատրեանը
19-03-2009 17:15:00 | Հայաստան | Քաղաքական
ԵՐԵՎԱՆ, 19 ՄԱՐՏԻ, ՆՈՅԵԱՆ ՏԱՊԱՆ: Երեւանի աւագանու
ընտրութիւնները Հայ Ազգային կոնգրեսի (ՀԱԿ) համար ոչ թէ
քաղաքապետի պաշտօնին տիրանալու միջոց են, այլ առիթ` ապացուցելու,
որ 2008թ.-ի նախագահական ընտրութիւններում յաղթել է առաջին
նախագահ, ՀԱԿ-ի ղեկավար Լեւոն Տեր-Պետրոսեանը: Այսպիսի
յայտարարութեամբ հանդէս եկաւ «Այլընտրանք» քաղաքական-հասարակական
նախաձեռնութեան անդամ, ՀԱԿ-ի ներկայացուցիչ, Երեւանի նախկին
քաղաքապետ Վահագն Խաչատրեանը մարտի 19-ի ասուլիսում: Նրա խօսքերով,
դատելով այն հանգամանքներից, որ 2008թ.-ի ընտրութիւններում
Լ.Տեր-Պետրոսեանն իր քուէների մեծամասնութիւնը ստացել էր
Երեւանում, եւ որ մայրաքաղաքում իշխանութիւնները միշտ էլ
դժուարութեամբ են կեղծիքներ իրականացրել, ՀԱԿ-ի յաղթանակը մայիսի
31-ի ընտրութիւններում կասկած չի հարուցում:
«Յաղթելով աւագանու ընտրութիւններում մենք շարունակելու ենք
պահանջել իշխանութիւնների հրաժարականը եւ արտահերթ համապետական
ընտրութիւններ»,- ասաց ընդդիմադիր գործիչը: Նրա կանխատեսմամբ,
իշխանութիւնները չեն կարողանալու դիմակայել երկրի առջեւ ծառացած
քաղաքական ու սոցիալ-տնտեսական մարտահրավերներին եւ արդիւնքում
համաձայնելու են գնալ արտահերթ նախագահական ընտրութիւնների: Այդ
ընտրութիւնները, ըստ Վ.Խաչատրեանի, անցկացուելու են կամ 2009թ.-ին
կամ էլ, ծայրայեղ դէպքում, 2010թ.-ի սկզբին:
Անդրադառնալով աւագանու ընտրութիւններին միասնական ցուցակով
մասնակցելու վերաբերեալ ՀԱԿ-ի եւ «Ժառանգութեան» քննարկումներին,
նախկին քաղաքապետը հոյս յայտնեց, որ այդ երկու քաղաքական ուժերը
ընդհանուր եզրեր, այնուամենայնիւ, կգտնեն: Վ.Խաչատրեանը կրկնեց, որ
մայիսի 31-ին ոչ թէ աթոռի հարց է լուծուելու, այլ վճռուելու է
Հայաստանի յետագայ ճակատագիրը: