Առաջարկւում է որոշ ապրանքատեսակների ներմուծման դէպքում
ԱԱՀ-ի գումարների գանձման ժամկէտը յետաձգել մինչեւ 3 տարով ժամկէտով
23-02-2009 23:40:00 | Հայաստան | Տնտեսութիւն
ԵՐԵՎԱՆ, 23 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Հայաստանի Ազգային Ժողովը
փետրուարի 23-ին առաջին ընթերցմամբ քննարկեց կառավարութեան
հեղինակած օրինագիծը, որով փոփոխութիւններ եւ լրացումներ են
նախատեսւում «Աւելացուած արժէքի հարկի մասին» գործող օրէնքում: Ըստ
այդմ, առաջարկւում է ՀՀ կառավարութեան սահմանած կարգով ընտրուած
ընկերութիւնների կողմից որոշ ապրանքատեսակների, մասնաւորապէս,
սարքավորումների եւ հոսքագծերի, ներմուծման դէպքում մաքսային
մարմիննների հաշուարկած ԱԱՀ-ի գումարների գանձման ժամկէտը յետաձգել
մինչեւ 3 տարով այն դէպքում, եթէ ներմուծուած ապրանքների մաքսային
արժէքը կամ ներդրումային փաթեթը կազմում կամ գերազանցում է 300 մլն
դրամը (շուրջ 1 մլն ԱՄՆ դոլար ):
Հիմնական զեկուցող, էկոնոմիկայի նախարար Ներսէս Երիցյանի
հիմնաւորմամբ, նախագիծը, որի արժէքը նախնական հաշուարկներով շուրջ 5
մլրդ դրամ է, դասւում է հակաճգնաժամային միջոցառումների շարքին:
Այն նաեւ միտուած է Հայաստանում տեխնոլոգիական փոխակերպման եւ
տնտեսութեան արդիականացման ապահովմանը, կապիտալ ներդրումների
աւելացմանը: Նախատեսւում է, որ առաջարկուող արտօնութիւնը կգործի
մինչեւ 2011թ.-ը: «Կարծում ենք, այն ծախսերը, որոնց մենք գնում
ենք, երկար եւ միջին ժամկէտում շատ աւելի մեծ օգուտներ կստեղծեն»,-
ասաց նախարարը:
Ներկայումս գործող օրէնքով որոշակի ծածկագրերին դասվող
ապրանքների ներմուծման դէպքում, եթէ մաքսային արժէքը պակաս է 70
մլն դրամից, մաքսային մարմինների հաշուարկած ԱԱՀ-ի գումարների
վճարման ժամկէտը յետաձգւում է 1 տարով, իսկ 70 մլն դրամ եւ աւելիի
դէպքում` 2 տարով:
Մի շարք պատգամաւորների, այդ թւում Տնտեսական հարցերի մշտական
յանձնաժողովի նախագահ Վարդան Այվազեանի, հիմնական առարկութիւնները
պայմանաւորուած էին ընկերութիւնների ընտրութեան հարցում հնարաւոր
սուբյեկտիւ դրսեւորումների բացառմամբ: Եթէ մի մասը գտնում էր, որ
անհրաժեշտ է յստակ սահմանել չափորոշիչները, ապա միւս մասը
առաջարկում էր հաւասար դաշտ ստեղծել արտադրութեան զարգացման
նպատակով ներդրումներ կատարող բոլոր տնտեսվարող սուբյեկտների
համար: