«Ոսկէ ծիրան» 7-րդ երեւանեան միջազգային կինոփառատոնն այս տարի
կանցկացուի յուլիսի 11-18-ին
20-05-2010 19:30:00 | Հայաստան | Մշակոյթ
ԵՐԵՎԱՆ, 20 ՄԱՅԻՍԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: «Ոսկէ ծիրան»
7-րդ երեւանեան միջազգային կինոփառատոնն այս տարի կանցկացուի
յուլիսի 11-18-ին: Ինչպէս մայիսի 20-ի ասուլիսում յայտնեց «Ոսկէ
ծիրան» կինոփառատօնի ծրագրերի տնօրէն Միքայէլ Ստամբոլցեանը,
փառատոնը ստացել է մօտ 500 յայտ աշխարհի 75 երկրներից, այդ թւում
առաջին անգամ Հորդանանից, Նիկարագուայից, Վենեսուելայից, Կոստա
Ռիկայից եւ այլն: Նրա խօսքերով, ներկայացուած ֆիլմերից կընտրուեն
ամենաշատը 100-120-ը: Նա նշեց, որ այս տարի փառատոնը հարուստ է
երեւանեան պրեմիերաներով. ներկայացուելու են Սերգեյ Սոլովյովի
«Համադասարանցիները», Բեռլինի փառատոնի գլխաւոր մրցանակակիր Սեմիհ
Կապլանողլուի «Մեղրը», հայազգի ռեժիսոր Կարեն Շահնազարովի
«Հիւանդասենեակ համար 6»-ը, լեհ յայտնի ռեժիսոր Քշիշտոֆ Զանուսիի
նոր ֆիլմը` «Փոխայց»-ը, թուրքական ծագումով գերմանացի անուանի
ռեժիսոր Ֆաթիհ Ակինի «Հոգու խոհանոց»-ը, ամերիկացի Ռոբ Նիլսոնի
«Ոգեշնչուված»-ը եւ այլ ժապաւէններ:
Նշուեց նաեւ, որ այս տարի
փառատոնի ընթացքում յարգանքի տուրք է մատուցուելու հայ կինոյի մի
քանի նուիրեալների` կինոռեժիսոր Հենրիկ Մալեանի 85, դերասաններ Մհեր
Մկրտչեանի եւ Խորէն Աբրահամեանի 80-ամեայ հոբլեյանները, օպերատոր
Ալբերտ եւավուրյանի 75-ամեակը, ինչպէս նաեւ կեանքի 75-րդ տարում
դեռ ակտիւ նկարահանուող դերասան Արմէն Ջիգարխանյանի յոբելեանը
տոնելով: Յոբելեանի առթիւ լոյս է տեսնելու նաեւ Ալբերտ
եւավուրյանի մասին պատմող մի գիրք, որը կներառի նաեւ նրա յուշերը:
Կլինեն նաեւ երկու սփիւռքահայ ռեժիսորների հոբելեաններին նուիրուած
յատուկ ծրագրեր` «Անրի Վեռնոյ - 90» եւ «Ատոմ Էգոյան - 50»:
Փառատոնի պատուաւոր նախագահ, կանդահայ անուանի ռեժիսոր Ատոմ Էգոյանի
տարեդարձը կնշուի իր իսկ մասնակցութեամբ:
Նշուեց նաեւ, որ փառատոնը բացելու է Անրի Վեռնոյի «Մայրիկ»
ֆիլմը: Ֆիլմում նկարահանուած դերասաններից ոմանք ներկայ են լինելու
փառատօնին:
Կինոփառատօնի գեղարուեստական հարցերով տնօրէն Սուսաննա
Յարութիւնեանի խօսքերով, ոչ միայն աշխարհի լաւագոյն ֆիլմերն են
բերւում Հայաստան, այլեւ կինոյի ասպարէզում հաստատւում ու
վերահաստատւում է հայկական կինոն:
ՀՀ մշակոյթի նախարար Յասմիկ Պողոսեանը նշեց, որ
իւրաքանչիւր տարի բոլորն սպասում հայկական այս կինոփառատօնին`
ինչպէս Հայաստանում, այնպէս էլ դրսում: «Փառատոնը վաղուց դուրս է
եկել Հայաստանի աշխարհագրական սահմաններից, մեծ հնչեղութիւն ունի
արտերկրում: Մշակոյթային կեանքի համար չափանզանց կարեւոր
իրադարձութիւն է»,- ասաց նա: