Հալեպի պետական համալսարանի լեզվագիտական կենտրոնում բացուելու
է հայոց լեզուի ուսուցման ամբիոն
07-04-2010 16:46:00 | | Հասարակութիւն
ՀԱԼԵՊ, 7 ԱՊՐԻԼԻ, ՆՈՅԵԱՆ ՏԱՊԱՆ: Երեւանի պետական համալսարանի
ռեկտոր Արամ Սիմոնեանը եւ Հալեպի պետական համալսարանի նախագահ
Նիդալ Շհադեն ապրիլի 6-ի հանդիպման ընթացքում քննարկել են Հալեպի
համալսարանին կից լեզվագիտական կենտրոնում հայոց լեզուի ուսուցման
ամբիոնի բացմանն առնչուող խնդիրներ: Պայմանաւորուածութիւն է ձեռք
բերուել սեպտեմբերի 1-ից կենտրոնում սկսել հայոց լեզուի ուսուցման
դասընթացները ինչպէս արաբների, այնպէս էլ սիրիահայերի համար:
ԵՊՀ-ի ռեկտորը պատրաստակամութիւն է յայտնել Հալեպ գործուղել
հայոց լեզուի դասախօս, կենտրոնին ապահովել նաեւ ուսումնական
նիւթերով, գրականութեամբ ու համակարգիչներով: Ն.Շհադեն տեղեկացրել
է, որ հայոց լեզուի ուսուցման լսարանն արդէն կահաւորուած է եւ
պատրաստ է ուսումնական գործընթացին:
Ըստ ՀՀ ԱԳՆ Մամուլի եւ տեղեկատուութեան վարչութեան
հաղորդագրութեան, կողմերը քննարկել են նաեւ ապագայում Հալեպի
համալսարանում հայագիտութեան ամբիոնի բացման հնարաւորութիւնները:
Հանդիպմանը մասնակցել են Հալեպում Հայաստանի գլխաւոր
հիւպատոս Աշոտ Մանուկեանը եւ Սիրիայի Հայ աւետարանական համայնքի
համայնքապետ Յարութիւն Սելիմյանը: