Հալեպի պետական համալսարանի լեզվագիտական կենտրոնում բացվելու
է հայոց լեզվի ուսուցման ամբիոն
07-04-2010 16:46:00 | Սիրիա | Հասարակություն
ՀԱԼԵՊ, 7 ԱՊՐԻԼԻ, ՆՈՅՅԱՆ ՏԱՊԱՆ: Երեւանի պետական համալսարանի
ռեկտոր Արամ Սիմոնյանը եւ Հալեպի պետական համալսարանի նախագահ
Նիդալ Շհադեն ապրիլի 6-ի հանդիպման ընթացքում քննարկել են Հալեպի
համալսարանին կից լեզվագիտական կենտրոնում հայոց լեզվի ուսուցման
ամբիոնի բացմանն առնչվող խնդիրներ: Պայմանավորվածություն է ձեռք
բերվել սեպտեմբերի 1-ից կենտրոնում սկսել հայոց լեզվի ուսուցման
դասընթացները ինչպես արաբների, այնպես էլ սիրիահայերի համար:
ԵՊՀ-ի ռեկտորը պատրաստակամություն է հայտնել Հալեպ գործուղել
հայոց լեզվի դասախոս, կենտրոնին ապահովել նաեւ ուսումնական
նյութերով, գրականությամբ ու համակարգիչներով: Ն.Շհադեն տեղեկացրել
է, որ հայոց լեզվի ուսուցման լսարանն արդեն կահավորված է եւ
պատրաստ է ուսումնական գործընթացին:
Ըստ ՀՀ ԱԳՆ Մամուլի եւ տեղեկատվության վարչության
հաղորդագրության, կողմերը քննարկել են նաեւ ապագայում Հալեպի
համալսարանում հայագիտության ամբիոնի բացման հնարավորությունները:
Հանդիպմանը մասնակցել են Հալեպում Հայաստանի գլխավոր
հյուպատոս Աշոտ Մանուկյանը եւ Սիրիայի Հայ ավետարանական համայնքի
համայնքապետ Հարություն Սելիմյանը: