ՎԱՇԻՆԳՏՈՆ, 30 ՅՈՒՆՎԱՐԻ, ՆՈՅԵԱՆ ՏԱՊԱՆ: Ամերիկեան Իլլինոյսի
նահանգի նահանգապետ Ռոդ Բլագոեւիչը Սենատի որոշմամբ մեղաւոր է
ճանաչուել ծառայողական դիրքի չարաշահման համար եւ ազատուել իր
պարտականութիւններից, հաղորդում է BBC-ն:
Բլագոեւիչի պաշտօնանկմանը կողմ են արտայայտուել Սենատի 59
անդամներ, դէմ` ոչ ոք: Այդպիսով սենատորները հաւանութիւն են տուել
այն մեղադրանքներին, որ Բլագոեւիչը փորձել է վաճառել այն տեղը
Սենատում, որն ազատուել էր Բարակ Օբամայի ԱՄՆ-ի նախագահ ընտրվելուց
յետոյ:
Բլագոեւիչը առաջին նահանգապետն է վերջին 20 տարիների
ընթացքում, որ պաշտօնից հեռացւում է իմպիչմենթի ընթացակարգի
արդիւնքում:
Բլագոեւիչը ձերբակալուել է 2008 թուականի դեկտեմբերին, այժմ նա
սպասում է դատի` կաշառակերութեան մեղադրանքով: