ՀԱՐԿԱՅԻՆ ՔԱՂԱՔԱԿԱՆՈՒԹԻՒՆԸ ԲԱՐԵԼԱՒԵԼՈՒ ՀԱՄԱՐ ԿԱՌԱՎԱՐՈՒԹԵԱՆ
ՆՈՐ ԾՐԱԳՐԻ ՀԱՄԱՁԱՅՆ, ՀԱՐԿԵՐԻՑ ԽՈՒՍԱՓՈՂՆԵՐԻ ԱՆՈՒՆՆԵՐԸ
ԿՆԵՐԿԱՅԱՑՈՒԵՆ ՀԱՆՐՈՒԹԵԱՆԸ
29-05-2008 23:00:00 | Հայաստան | Տնտեսութիւն
ԵՐԵՎԱՆ, 29 ՄԱՅԻՍԻ, ՆՈՅԵԱՆ ՏԱՊԱՆ: Հայաստանի գործարարները
միշտ պէտք է յիշեն, որ պետութիւնը նրանց հետ նոյն կողմում է, այլ
ոչ թէ միւս կողմում: Այսպիսի յայտարարութեամբ հանդէս եկաւ ՀՀ
նախագահ Սերժ Սարգսեանը Հայաստանի խոշոր գործարարների հետ մայիսի
29-ի հանդիպմանը: Նրա խօսքերով, չպէտք է մոռանալ, որ պետութեան եւ
մասնաւոր հատուածի շահը համընկնում է, եւ այդ շահը արագ զարգացող
բիզնեսն է: Ըստ նախագահի, պետութիւնը եւ գործարարները նախեւառաջ
փոխադարձ վստահութիւնն ամրապնդելու խնդիր ունեն, սակայն դա չի
նշանակում, որ հարկային տեսուչի հետ հանդիպելիս գործարարները
տհաճություն չեն ունենայ:
«Մենք վերաբերմունքի փոփոխութեան խնդիր ունենք»,- ասաց
Ս.Սարգսեանը: Նա պարզաբանեց, որ գործարարի հետ շփուող իւրաքանչիւր
պետական ծառայող պէտք է իմանա, որ իր գործը ծառայութիւն մատուցելն
է, իսկ գործարարն իր հերթին պէտք է հարկային ծառայութեանը
վերաբերուի ոչ թէ որպէս վնասողի կամ ստուգողի, այլ որպէս մարմնի,
որն իր բնականոն գործն է կատարում: Նախագահը շեշտեց, որ բոլոր
գործարարները «պէտք է աշխատեն հարկային դաշտում»: Պետութեանը
խաբելու դէպքերը, որոնք, նրա խօսքերով, այսօր բազմաթիւ են, պէտք է
բացառուեն:
Ս.Սարգսեանը յաւելեց, որ ՀՀ դատախազութիւնը, ոստիկանութիւնը
եւ Ազգային անվտանգութեան ծառայութիւնը չպէտք է մտահոգվեն փոքրիկ
ընկերութիւնների` հարկերի վճարումից խուսափելու դեպքերով, եթէ,
իհարկէ, դրանք պարբերական բնոյթ չեն կրում:
Հանդիպմանը ներկայ ՀՀ վարչապետ Տիգրան Սարգսեանը նշեց, որ
կառավարութեան հայեցակարգը հետեւեալն է` «դէմքով դէպի հարկային
վճարումներ»: Նա յիշեցրեց, որ կառավարութիւնը հարկային
քաղաքականութիւնը բարելաւելու համար մշակել է համալիր
միջոցառումների ծրագիր: Այն, ինչպէս շեշտեց վարչապետը, բաղկացած է
7 հիմնական կէտից: Առաջինը վերաբերում է խոշոր բիզնեսի ճիշտ եւ
ժամանակին կատարւող հարկմանը, երկրորդը` փոքր ձեռներեցների
նկատմամբ «փափուկ» հարկային քաղաքականութեանը, երրորդը` հարկային
ծառայութիւնում կոռուպցիայի յաղթահարմանը: Ծրագրի չորրորդ կէտը
սահմանում է, որ գործարարի եւ հարկային մարմնի անձնական շփումը
պէտք է բացառել: Հինգերորդ կէտը վերաբերում է հարկային
ստուգումների իրականացմանը, վեցերորդը` հարկային փաստաթղթերը
ձեւակերպելիս գործարարներին օգնող կենտրոնների ստեղծմանը: Ծրագրի
եօթերորդ կէտը նախատեսում է, որ պէտք է պարբերաբար կազմվեն
հարկերից խուսափողների ցուցակները, որոնք պէտք է ներկայացուեն
հանրութեանը: