«ԱՐՄԷՆՏԵԼ» ՓԲԸ ԳԼԽԱՒՈՐ ՏՆՕՐԷՆ Է ՆՇԱՆԱԿՈՒԵԼ ՆԵՅՉՈ ՎԵԼԻՉԿՈՎԸ
20-05-2008 17:30:00 | Հայաստան | Տնտեսութիւն
ԵՐԵՎԱՆ, 20 ՄԱՅԻՍԻ, ՆՈՅԵԱՆ ՏԱՊԱՆ: «Վիմպելկոմ» ԲԲԸ-ն
յայտարարեց Հայաստանի տարածքում Beeline ապրանքանշանի ներքոյ կապի
ծառայութիւններ մատուցող դուստր ձեռնարկութեան` «արմէնտել» ՓԲԸ
գլխաւոր տնօրէնի պաշտօնում Նեյչո Վելիչկովի նշանակելու մասին:
«արմէնտելը» մեր բիզնեսի կարեւոր բաղկացուցիչն է եւ որոշիչ
տարր այլ երկրներում «Վիմպելկոմի» զարգացման ռազմավարութեան
համար,- նշեց «Վիմպելկոմ» ԲԲԸ ԱՊՀ երկրներում բիզնեսի զարգացման
գծով գործադիր փոխնախագահ Դմիտրի Պլեսկոնոսը: Ըստ նրա, Հայաստանում
իրենք օժտուած են կապի բոլոր տեսակների լիցենզիաներով, եւ գլխաւոր
տնօրէն փնտրելիս «հիմք է հանդիսացել Նեյչո Վելիչկովի բազմակողմանի,
եւ որ գլխաւորն է, յաջող մենեջերական փորձը»: «Վստահ եմ, որ նրա
գիտելիքները կօգնեն ընկերութեանը արդիւնաւէտ իրագործելու առաջաւոր
հեռահաղորդակցական տեխնոլոգիաների ներդրման ուղղութեամբ իր առջեւ
ծառացած խնդիրները եւ նրա համար ապահովել առաջատար դիրքեր
սպասարկման ոլորտում»,- նշեց Դ. Պլեսկոնոսը:
Մեկնաբանելով իր նշանակումը, Նեյչո Վելիչկովը նշեց. «Այսօր
մեր գլխաւոր նպատակն է Հայաստանի տարածքում զարգացնել Beeline
բրենդը, սկսել ծառայութիւններ 3-րդ սերնդի ցանցի բազայի վրայ եւ
կոնվերգենտային ծառայութիւններ, ինչպէս նաեւ բարելաւել կապի որակը
եւ սպասարկման մակարդակը: Յաջողութեան հասնելով այդ
ուղղութիւններում, մենք անպատճառ ժողովրդականութիւն կվայելենք
Հայաստանի բնակիչների շրջանում եւ կդառնանք հանրապետութեան
առաջատար սպասարկող ընկերութիւնը»:
Նեյչո Վելիչկովը ծնուել է 1961 թուականի սեպտեմբերի 27-ին Սոֆիա
քաղաքում (Բուլղարիա): Բարձրագոյն կրթութիւն ստացել է
Ռուսաստանում, Մոսկուայի միջազգային յարաբերութիւնների պետական
ինստիտուտում, որն աւարտել է 1990 թուականին: 2001 թուականին ստացել
է MBA աստիճան ԱՄՆ-ի Սիեթլի համալսարանում, իսկ 2007 թուականին`
մենեջմենտի եւ լիդերութեան դիպլոմ ԱՄՆ-ի Մասաչուսեթսի
տեխնոլոգիական ինստիտուտում: Հեռահաղորդակցության ոլորտում
աշխատում է 2000 թուականից: Եղել է կորպորատիվ վաճառքի
պատասխանատուն Բուլղարիայի խոշորագոյն GSM-օպերատոր MobilTel-ում,
ինչպէս նաեւ տնօրինել է ընկերութեան համալիր լուծումների վաճառքն
ու մարկետինգը, որ համադրում են ֆիքսուած, շարժական եւ IP
հեռախօսակապի հնարաւորութիւնները: Վերջին երեք տարիներին
գլխաւորել է Բուլղարիայի ֆիքսուած կապի խոշորագոյն օպերատոր
«Բուլղարիայի հեռահաղորդակցական ընկերութեան» (ԲՀԸ)
բիզնես-սեգմենտի մարկետինգը եւ վաճառքը, որտեղ մասնակցել է
բուլղարական շուկայում շարժական կապի օպերատոր` ԲՀԸ դուստր
ձեռնարկութեան ստեղծմանն ու առաջխաղացմանը:
Հեռահաղորդակցային բիզնես Նեյչո Վելիչկովը եկել է սեփական
ընկերությունից, որը խորհրդատուական ծառայութիւններ էր մատուցում
Ռուսաստանում եւ Եվրոհամայնքի երկրներոմւ բիզնեսի հիմնման եւ
զարգացման վերաբերեալ:
Նեյչո Վելիչկովի նուաճումների թւում է կապի նոր
ծառայութիւնների յաջող ներդրումը շուկայում (կոնվերգենտային
ծառայութիւններ եւ լուծումներ, GSM Gateway, VoIP լուծումներ, GSM
POS տերմինալներ, mobile VPN):